හැඳින්වීම

අසමි දකිමි සොයමි වර්ඩ්ප්‍රෙස් බ්ලොග් අඩවියට සමගාමීව ප්‍රකාශයට පත්කෙරේ

10 February 2013

වෙන අය වගේ නෙවෙයි අපි ගහන්නේ ඔලුවෙන් හරිද මල්ලී (දෙවැනි කොටස) – Military Psychological Operations (Part Two)


gossippng clip art  අපි ගහන්නේ ඔලුවෙන් හරිද මල්ලී ලිපියේපළමුවැනි කොටස මා ලිව්වේ ඔබ කුමන ආකාරකින් ඒ ලිපිය බාරගනියිද කියන සැකය සහිතවයි. එහෙත් ප්‍රතිචාර දැක්වූවන්ගෙන් බහුතරය ඒ ලිපිය අගය කර තිබුනා. ඔබෙන් ලද ධෛර්යය මත දෙවැනි කොටස ලියනවා. මේ කොටසේදී මම ඔබට තරමක් ගැඹුරු න්‍යායාත්මක කරුණු ඉදිරිපත් කරනවා. එහෙත් ඒ න්‍යායාත්මක කරුණු මා ඔබ වෙනුවෙන් හැකි තරම් සරල ආකාරයට ඉදිරිපත් කරන්න සියලු උත්සාහ ගන්නවා. ඒ නිසා සමහර කොටස් යන්තමින් සඳහන් කිරීම පමණයි කරන්නේ.
  මේ විෂයය ගැන දැනුමක් ඇති අය වෙත මා කාරුණිකව දන්වා සිටින්නේ සමහර ගැඹුරු කොටස් මේ ලිපියට ඇතුලත් කර නැත්තේ ලිපිය නීරස වෙයි යන හැඟීම නිසා බවයි.
  මේ ලිපියේදී මා මුලින්ම අවධානය යොමු කරන්නේ සයි ඔප්ස් සම්බන්ධ පිළිවෙත පිළිබඳව කරුණු සඳහන් කරන්නයි. නේටෝ (උතුරු අත්ලාන්තික් ගිවිසුම් සංවිධානය) (NATO = North Atlantic Treaty Organization) වැනි ලෝක සම්මත මහා පරිමාන සංවිධාන වල සිට, ඕනෑම පුංචි රටක් දක්වා සෑම පිළිගත් රාජ්‍ය සංවිධානයකටම සයි ඔප්ස් පිලිබඳ ප්‍රතිපත්ති මාලාවක් තිබෙනවා. පොදුවේ ගත් කල ඒ සෑම සංවිධානයකම මූලික සයි ඔප්ස් ප්‍රතිපත්තිය වන්නේ;
1.  තම දේශපාලන, ආර්ථික, සමාජයීය, රාජ්‍ය පරිපාලන,  අරමුණු සහ අභිමතාර්ථ අභියෝගයට ලක්නොවී පවත්වාගෙනයාම සඳහාත්
2. තමන්ගේ තක්සේරුව සහ බුද්ධි තොරතුරු අනුව අනාගතයෙදී ඇතිවියහැකි යයි උපකල්පනය කරන සංග්‍රාමික තත්වය වෙනුවෙන් ගන්නා මූලෝපාය ක්‍රියාමාර්ග සාර්ථක කරගැනීම සඳහා යුධමය ක්‍රියාමාර්ග නොගෙන අනුගමනය කළහැකි විකල්ප ක්‍රියාමාර්ගයක් ලෙසත්
සයි ඔප්ස් යොදාගැනීමයි.
  සයි ඔප් එකක් අපි හිතන තරම් සරලව හෝ සැහැල්ලුවෙන් ගෙන ක්‍රියාකරන්න බැහැ. සයි ඔප් එකක් කියන්නේ දෙපැත්ත කැපෙන පිහියක්, එහෙමත් නැත්නම් යවපු මිනිහාවම හොයාගෙන ආපහු එන පිල්ලියක්, බූමරංගයක්, පාරාවළල්ලක්, වෙන්නත් ඉඩ තියනවා. ඒ නිසා සයි ඔප් එකක් කරන්න පෙර ඉතා කල්පනාකාරී සැලසුමක් හැදිය යුතුයි. එහිදී පදනම් කරගන්නා ප්‍රධාන සාධකය වන්නේ රාජ්‍ය බුද්ධි අංශ සහ හමුදා බුද්ධි අංශ මගින් සොයාගන්නා බුද්ධි තොරතුරුයි. බුද්ධි අංශ කියන්නේ යුද්ධයක් තිබුනත් නැතත් නොකඩවා ක්‍රියාත්මකව පවතින කාර්ය භාරයක්. මම හිතනවා ඔබෙන් බොහෝ දෙනා දන්නවා ලෝකයේ බොහොමයක් රටවල් පිට රටවල තිබෙන තම තානාපති කාර්යාල මගින් බුද්ධි තොරතුරු හොයන බව. ඊට අමතරව ඒ රටවල ඇති විශේෂ රැකියා (උදාහරණයක් වශයෙන් ඇමරිකාවේ නාසා ආයතනයේ ඉහල මට්ටමේ රැකියාවක්) සඳහා තමන්ගේ රටේ කෙනෙක් රිංගවා ඔත්තු බැලීමත් කෙරෙනවා. නමුත් ඒ රටවල් නපුංසකයෝ නෙවෙයිනේ. ඒ රටවල් එවැනි අය පිළිබඳව නිරතුරුව ඇහැ ගහගෙනයි ඉන්නේ. ඔබ අහලා/කියවලා/දැකලා ඇති සමහර රටවල් ‘මෙන්න මේ තානාපති කාර්යාල නිලධාරියා අපේ රට ගැන ඔත්තු බැලුවා’ කියා ඔවුන්ව තම රටෙන් ආපසු යවන අවස්ථා. ඒවා සුළුපටු සිදුවීම් නෙවෙයි.
  micඅපේ රටෙත් රාජ්‍ය සහ හමුදා බුද්ධි අංශ උපරිම මට්ටමෙන් සිය සේවය ඉටුකරනවා. ඒ සේවා නොතිබෙන්නට එල්.ටී.ටී.ඊ. සංවිධානය සමග තිබුන සටන මීට වඩා බොහොම බරපතල වන්නට හොඳටම ඉඩ තිබුනා. ශ්‍රී ලංකා යුදහමුදා සන්නද්ධ බුද්ධි බලකාය (ස.බු.බ.) (SLAMIC = Sri Lanka Army Military Intelligence Corps) කල සේවය වචනයෙන් කියන්නට බැරි තරම් අගනා සේවයක්. ඒ බලකාය විසින් ඉතා දැඩි දුෂ්කර තත්වයන්ට මුහුණ දෙමින් ලබාදුන් තොරතුරු පදනම් කරගෙන විශාල සයි ඔප්ස් ගණනක් දියත් කරන්නට හැකිවුනා.  (හැබැයි සන්නද්ධ බුද්ධි බලකායෙන් ලැබෙන තොරතුරු බහුල ලෙස පාවිච්චි කරන්නේ සයි ඔප්ස් වලද වඩා සාමාන්‍ය යුද මෙහෙයුම් වලටයි) මේ බලකාය වඩාත් සංවිධානාත්මකව ආරම්භ කෙරුනේ 1990 දශකයේ මුල් භාගයේදීයි.  
  හොඳයි, මීළඟට මා ඔබ සමග සාකච්ඡා කරන්නේ, සයි ඔප්ස් වර්ග මොනවාද? ඒ සයි ඔප්ස් වර්ග දියත් කරන්නේ කෙසේද? යන්න පිළිබඳවයි. මෙහිදී මේ තොරතුරු ඔබවෙත ගෙන එන්නට මා පදනම් කරගන්නේ නේටෝ සංවිධානයේ සයි ඔප්ස් ප්‍රතිපත්ති මාලාවයි. ඔබ නැවතත් සයි ඔප්ස් නිර්වචනය මතක් කරගත්තානම් හොඳයි.  තවත් දෙයක් මෙතනදී ඉතා අවධාරණයෙන් මතක් කරන්න ඕනේ. සයි ඔප්ස් හමුදාවේ ඉන්න සෑම අණදෙන නිලධාරියාටම අවශ්‍ය විදිහට කරන්න බැහැ. අපේ රටේනම් යුද හමුදා මූලස්ථානයේ අනුමැතිය යටතේ සේනාංක මූලස්ථානයක (Division Headquarters) මට්ටමෙන් තමයි සයි ඔප්ස් දියත් කෙරෙන්නේ. නමුත් ආරක්‍ෂක අමාත්‍යාංශය මට්ටමෙන් තමයි බොහෝ සයි ඔප්ස් සැලසුම් කෙරෙන්නේ සහ දියත් කෙරෙන්නේ. ඒ තමයි ජාත්‍යන්තර වශයෙන් පිළිගන්නා ක්‍රමය. ඒ වගේම තමයි සයි ඔප් එකකට සම්බන්ධ කරගන්නා නිලධාරීන්ට සහ සෙබළුන්ට ඒ පිලිබඳ පූර්ව දැනුම, පුහුණුව, සහ අවබෝධය තිබිය යුතුයි. එමෙන්ම යුද හමුදා ක්රියාන්විතයකදී ඉතා ඉහලින් පවත්වාගෙන යන ‘දැනගතයුතු අය පමණක් අවශ්‍ය දේ දැන සිටීම’ (need to know basis) යන ප්‍රමිතිය දැඩිව ආරක්ෂා කරගත යුතුයි.
  සයි ඔප්ස් වර්ග යනුවෙන් මා අදහස් කලේ ඒ ඒ මට්ටමෙන් සිදුවන සයි ඔප්ස් පිළිබඳවයි. මෙයින් අදහස් කරන්නේ එක් එක සයි ඔප් එක කොපමණ විශාල ඉලක්කගත පිරිසක් වෙත එල්ලවන්නේද යන්නයි. අපි බලමු ඒ ඒ මට්ටම කුමක්ද යනවග.
මූලෝපාය පදනම් කරගත් මනෝවිද්‍යාත්මක මෙහෙයුම්
Strategic Psychological Operations
  මේ වර්ගයේ සයි ඔප්ස් තමයි බොහොම බරපතල ගණයට වැටෙන්නේ. ඒ කියන්නේ මෙවැනි සයි ඔප් එකක් යම්කිසි රටක් කරන්නේ ප්‍රධාන වශයෙන් තම රටේ ආරක්ෂාව, ඒකීය භාවය, පිළිබඳව වෙනත් රටවලින් එල්ලවන තර්ජන අවම කරගැනීම සඳහායි. උදාහරණයක් කියන්නම්. ඉරානය, උතුරු කොරියාව වැනි රටවල් පහුගිය කාලයේ කීප වරක් ප්‍රදර්ශනය කළා තමන් නිපදවූ අලුත්ම යුද අවි. විශේෂයේ දිගු දුර ඉලක්ක වලට පහර දිය හැකි මිසයිල. මේගොල්ලෝ මෙහෙම කරන්නේ ඇයි? ඔවුන් තුල සාධාරණ සැකයක් තිබෙනවා ලෝකයේ වෙනත් රටවලින් තමන්ට යුදමය තර්ජන එල්ලවෙයි කියා. ඉතින් ඔවුන් කරන්නේ ‘අපිත් ඕනේ එකකට ලෑස්තියි’ කියලා ලෝකෙට පෙන්නන එකයි. සමහරවිට ඒ අවි කියන තරම් ප්‍රබල ඒවා නොවෙන්න පුළුවන්. නමුත් අරවගේ ජාත්‍යන්තර මට්ටමේ ප්‍රදර්ශනයක් කිරීම (තමන්ගේම රට තුලදී ඒ මිසයිල ගුවනට යවා, ඒවා වීඩියෝ කර, ජාත්‍යන්තර ප්‍රවෘත්ති ආයතන වෙත ලබාදීම මගින් ලෝකෙටම පෙන්වීම) තුලින් එයාලා කරන්නේ මූලෝපාය මට්ටමේ සයි ඔප් එකක්. එවැනි සයි ඔප්ස් සඳහා තීරණ ගන්නේ, රටේ නායකයන්, ඇමති වරුන්, හමුදා ප්‍රධානීන් ගෙන් සමන්විත ජාතික ආරක්ෂක කමිටුවක් විසින්. ඒ නිසා එය ඉහලම මට්ටමේ සයි ඔප්ස් ගණයට වැටෙනවා.  
සංග්‍රාමික මනෝවිද්‍යාත්මක මෙහෙයුම්
Military Operations based Psychological Operations
යම්කිසි රටක දැන් සිදුවෙමින් පවතින හමුදා ක්‍රියාමාර්ගයක් (අභ්‍යන්තර කැරැල්ලක් මැඩපැවැත්වීම, සිවිල් යුද්ධයක්, විදේශීය ආක්‍රමණයක්, වැනි) සඳහා ආධාර වශයෙන් (ඒ කියන්නේ තමන්ගේ හමුදාවට මහජන සහයෝගය ලබාගැනීම මෙන්ම සංග්‍රාමික රාජකාරියේ යෙදී සිටින හමුදා සාමාජිකයන්ගේ චිත්ත ධෛර්යය ඉහල මට්ටමකින් පවත්වාගැනීම) කෙරෙන සයි ඔප්ස් මේ ගණයට වැටෙනවා. මේ සයි ඔප්ස් පිලිබඳ තීරණ හමුදා ප්‍රධානීන් විසින් ගෙන ඒ සයි ඔප් එකේ ප්‍රබලත්වය අනුව රජයේ අනුමතිය ඇතිව හෝ හමුදා ප්‍රධානීන්ගේ තීරණ මත දියත් කෙරෙනවා. උදාහරණයක් වශයෙන් අපි හිතමු යම්කිසි රටක යුද හමුදාව රටේ අභ්‍යන්තර ගැටුමක යෙදී සිටියදී අධෛර්යයට පත්ව සිටිනවා කියා. ඔවුන්ගේ චිත්ත ධෛර්යය නැවත නගාසිටුවීම සඳහා විශේෂ දේශන, හමුදා උපක්‍රම ගැන නැවත මතක් කරදීම, පසුගිය කාලයේ ලද ජයග්‍රහණ මෙන්ම මේ දිනවල එම හමුදාවේම වෙනත් සේනාංක ලබා සිටින ජයග්‍රහණයන් පෙන්වාදීම වැනි දේ කලහැකියි. හැබැයි බොරු කරන්න බොරු කියන්න බැහැ. සියල්ල ඇත්ත දේ වියයුතුයි.
උපක්‍රමික මනෝවිද්‍යාත්මක මෙහෙයුම්
Tactical Psychological Operations
  මෙවැනි සයි ඔප්ස් සාමාන්‍යයෙන් කරන්නේ දැන් සිදුවෙමින් පවතින සංග්‍රාමයකට අවශ්‍ය ආධාරක බලවේගයක් ලෙස යොදා ගැනීම සඳහායි.
  සරල උදාහරණයක් කියන්නම්. ආපහු යමුකෝ අපේ රටේ එල්.ටී.ටී.ඊ. යුද්දෙට. අපිට ඕනේ මුලතිව් ප්‍රදේශය අල්ලගන්න. නමුත් සතුරා මුලතිව් ප්‍රදේශයේ ශක්තිමත්ව ඉන්න බව බුද්ධි තොරතුරු මගින් දැනගන්න ලැබෙනවා. ඒ වගේම අපි ගුවන් ප්‍රහාර, කාලතුවක්කු ප්‍රහාර එල්ල කලොත් මුලතිව් ප්‍රදේශයේ සාමාන්‍ය ජනතාවට හානිවෙන්න ඉඩ තියනවා. දැන් මොකද කරන්නේ? දැන් තමයි ඔලුවෙන් ගහන්න ඕනේ.
  අපි මෙහෙම දෙයක් කරනවා. A 9 මාර්ගයේ (මහනුවර – යාපනය) වවුනියාව ප්‍රදේශයේ ගමන් කරන දෙමල මහජනතාවට පෙනෙන්න, ප්‍රධාන මාර්ගයට ඈතින්, ලී කොට, ගෝනි, වැනි විවිධ අමුද්‍රව්‍ය වලින් කාලතුවක්කු, යුද්ධ ටැංකි හදලා, ඇත්තම ඒවා වගේ පෙනෙන විදිහට තියනවා. ඇත්ත කාලතුවක්කු සහ යුද්ධ ටැංකි එකක් දෙකක් පාර අසලත් තියනවා. ඊළඟට අපි ගුවන්විදුලි ප්‍රවෘත්ති ප්‍රචාර වලින් (විශේෂයෙන් දෙමල භාෂාවෙන්) දෙමල පුවත්පත් වලින් ප්‍රචාරයක් යවනවා ළඟදීම හමුදාව කිලිනොච්චි නගරය අල්ලන්න සුදානම් කියලා. වවුනියාවේ සිට කිලිනොච්චි පැත්තට යන මහජනතාව අතට ද්‍රවිඩ බසින් සකසන ලද අත් පත්‍රිකා බෙදා දෙනවා වහාම කිලිනොච්චි ප්‍රදේශයෙන් ඈත්වන්න ශ්‍රී ලංකා ආරක්ෂක හමුදා ළඟදීම ඒ ප්‍රදේශයට පැමිණෙන බව දන්වා. මේ අදහසම තියන පත්‍රිකා හෙලිකොප්ටරයක් මගින් කිලිනොච්චි ප්‍රදේශයට ඉහල අහසේ විසුරුවා හරිනවා.  දැන් මොකද වෙන්නේ? අපේ සයි ඔප් එක සාර්ථකනම් සතුරා ගොනාට අඳිනවා.    
helicopters%20vehicles%20uh60%20black%20hawk%204288x2848%20wallpaper_wallpaperswa_com_33
සතුරාට එතරම් පිරිස් බලයක් නැහැ. දැන් ඔහු කරන්නේ මුලතිව් ප්‍රදේශයේ සිටින තමන්ගේ භට පිරිස් වහාම කිලිනොච්චියට යොමු කිරීමයි. අපිටත් ඕනේ ඒ වැඩේ කරගන්නයි. දැන් අපි කරන්නේ හොර රහසේම මුලතිව් වලට ආසන්න ප්‍රදේශයක සඟවා සිටි අපේ හමුදාව යොදවා මුලතිව් අල්ලා ගැනීමයි. බලනකොට සයි ඔප්ස් කියන්නේ ‘කේර මලියක්’ නේද? නිකම් ‘බීරි මස්කට්’ කකා ඔව්වා කරන්න බැහැ.  :D  
  දැන් ඔබට වැටහෙනවා ඇති සයි ඔප්ස් කියන්නේ තනිකරම ප්‍රචාරක යුද්ධයක් කියලා. ඔව් එක අතකට ඒක සම්පූර්ණයෙන්ම ප්‍රචාරක යුද්ධයක්. කොහොමද මේ ප්‍රචාරය කරන්නේ. මූලෝපාය සයි ඔප් එකක්නම් විශාල ජාත්‍යන්තර ප්‍රචාරයක් අවශ්‍ය වෙනවා. ඒ සඳහා ජාත්‍යන්තර ප්‍රවෘත්ති ආයතන වල (බී.බී.සී,  සී.එන්.එන්,  අල් ජසීරා, වැනි)  සහාය ලබාගත් යුතුයි. එකත් නිකම්ම කරන්න බැහැ, කිසියම් පූර්ව සබඳතා ගොඩ නගාගත යුතුයි. අපි හිතමු අපිට සයි ඔප්ස් දාන්න ඕනේ රට අපේ රටට ආසන්නව තියෙන්නේ කියලා. එහෙනම් අපිට පුළුවන් අපේ රූපවාහිනී සහ ගුවන්විදුලි නාලිකා (චන්ද්‍රිකා නාලිකාද ඇතුළුව) වලින් අර රටට එරෙහි ප්‍රචාර (ඒ රටේ අයගේ භාෂාවෙන් කරන්න පුලුවන්නම් බොහොම ඉහලයි) කරගෙන යමින්, ඒ රටේ ජනතාවගේ අදහස් වෙනස් කිරීමේ යුද්ධයක යෙදෙන්න.
satcom
එපමණක් නෙවෙයි ඒ රටට ඉතා ඉහල අහසේ පියාඹන, විශේෂයෙන් සැකසූ ගුවන් යානා වල සිට මෙවැනි ප්‍රචාර කල හැකියි. මෙවැනි ගුවන්යානා විශේෂයෙන්ම යොදවාගන්නේ ගුවන්විදුලි ප්‍රචාරක මධ්‍යස්ථාන ලෙසයි.
ec130dsa2
DN-SD-04-01674
සම්පූර්ණයෙන් හෝ අර්ධ වශයෙන් අපේ පාලනය යටතේ පවතින ප්‍රදේශ වල ප්‍රචාරණ කටයුතු සඳහා ශබ්දවිකාශන යන්ත්‍ර සවිකළ හමුදා වාහන යොදාගන්නවා. එහිදී සංගීතය ප්‍රචාරය කරමින් ජනතා අවධානය ලබාගෙන අපේ සයි ඔප් එකට අදාළ ප්‍රචායද කරගන්නවා.
640px-PSYOPS3ap
407559_360544257377537_420100426_npsyops-loudspeakers
මීට අමතරව බහුල වශයෙන් යොදාගන්නා ක්‍රමය වන්නේ පෝස්ටර් මගින් ප්‍රචාරය කිරීමයි. මිනිසුන්ගේ අදහස් වෙනස්වෙන ආකාරයට, සිතුම් පැතුම් වලට බලපෑමක් වන ආකාරයට, පෝස්ටර් සකසා ඒවා ඉලක්කගත් ජනතාව සිටින ප්‍රදේශවල ඇලවීම බොහොම ප්‍රතිඵල දායකයි.
GraffitiCover
psyops_offr_2
psyops_offr_1
හැබැයි මේ සියල්ලේ සාර්ථකත්වය රඳා පවතින්නේ එක්තරා මූලධර්ම තුනක් මත බව විශේෂයෙන් සඳහන් කල යුතුයි.  ඒ මූලධර්ම වන්නේ;
  1. සයි ඔප්ස් පිලිබඳ සිද්ධාන්ත අවබෝධ කරගෙන සිටීම.
  2. ඉලක්කගත පිරිස කවුරුන්ද යන්න මනාව අවබෝධ කරගෙන තිබීම.
  3. තමන් කරන සයි ඔප් එකෙහි ප්‍රබලත්වය කොතරම් දුරට යෙදවිය යුතුද යන්න අවබෝධ කරගෙන සිටීම.
  ලෝකයේ සමහර රටවල් තම රටේ ආරක්ෂාව, ඒකීය භාවය සඳහා මූලෝපාය සයි ඔප්ස් වල යෙදෙන බව මම ඉහත සඳහන් කල බව ඔබට මතක ඇති. ඉරානය, උතුරු කොරියාව වැනි රටවල් එවැනි සයි ඔප්ස් කරනවා යයි අපි සිතමු. තම යුද ශක්තිය පිලිබඳ ප්‍රචාරණ වැඩපිළිවෙල එවැනි සයි ඔප්ස් වලට හොඳ උදාහරණ. නමුත්, ඒවා වහාම තහනම් කලයුතුයි කියලා ඇමරිකාව වගේ රටවල් කෑගහන්නේ ඇයි? 
  ඔන්න මම මෙච්චරවෙලා නොකිව්ව දෙයක් කියන්නයි යන්නේ. ඔබ අහලා තියනවා නේද පරණ සිංහල කියමන් තියනවා, ‘දියරෙද්දෙන් බෙල්ල කපනවා’, ‘දිය යටින් ගින්දර ගෙනියනවා’ කියලා. ඒ කියන්නේ තමන්ගේ අරමුණු කූඨ විදිහට ඉෂ්ඨ කරගන්නවා කියන එකයි. ඉතින් ඇමරිකාව වගේ රටවල් අර සයි ඔප් එකට විරුද්ධව කෑ ගැසීම ‘ප්‍රති සයි ඔප්’ එකක්. මතක තියාගන්න ප්‍රති සයි ඔප්ස් (Counter Psycholigical Operations) කියලා ජාතියකුත් තියනවා. ඒ කියන්නේ අර සයි ඔප් එක කපලා යන්න අපිත් එකක් ආපහු කරනවා කියන එකයි. ඇමරිකාවේ පියාඹන පීරිසි වැනි යුද ගුවන් යානා තියනවා, ඒවා ක්ෂණයකින් ඕනෑම තැනකට යැවිය හැකියි, ඒවාට රේඩාර් වලට අසු නොවී පියවි ඇසට නොපෙනී ගමන් කල හැකියි, වැනි දේ ප්‍රති සයි ඔප්ස් කියලා හිතන්න ඉඩ තියනවා.
 මම ඉහත සඳහන් කළා මතක ඇති, ගුවන්විදුලි සහ රූපවාහිණී ප්‍රචාර පිළිබඳව. එම විකාශන සංඥා අවුල් කිරීම, සම්පූර්ණයෙන් වැලැක්වීම සඳහා එම සංඛ්‍යාත ඔස්සේම අර ප්‍රති විරුද්ධ රටෙන් වෙනත් සංඥා යැවීම කෙරෙනවා. මෙය විද්‍යුත් සංග්‍රාමයක් (Electronic Warfare) ලෙසත් හඳුන්වන්න පුළුවන්. ඒ සඳහා සංඥා අවුල් කරමින් (Jam) සැරිසරණ විශේෂ ගුවන් යානා, නැව්, ජංගම රථ, යොදවනවා.
මේ ලිපියේ පළමුවැනි කොටසේදී මම ඔබට පුංචි කතාවක් කිව්වා අර මරාගෙන මැරෙන බෝම්බකාරියගේ කතාව. මතකයි නේද? නැත්නම් දුවලා ගිහින් කියවලා එන්න. ඒ කතාවේදී අපි ජයගත්තා බෝම්බකාරිය සතුරු කඳවුරකදී ඒ කඳවුරු නායකයා අතින් දූෂණය වූ බව කියලා. මේකට කොහොමද ප්‍රති සයි ඔප් එකක් කරන්නේ. සතුරාත් ලියනවා අර බෝම්බකාරියගේ අත් අකුරු කියලා අතින් ලියන ලද ලිපියක්. සතුරාවත් අපිවත් ඇත්ත අත් අකුරු දන්නේ නැති වෙන්න පුළුවන්. මිනිස්සු විස්වාස කරන්නේ අත් අකුරු නෙවෙයි කතාව. කතාව ආපහු හරවමින් සතුරා කියනවා, ඇත්ත කතාව මේකයි, මේ කාන්තාව දැනට කලකට ඉහතදී අපේ හමුදාව විසින් මාර්ග බාධකයකදී පැහැරගෙන ගොස් දූෂණය කර ඇති බව. ඒ පැහැරගැනීම සියැසින් දුටු බවට තවත් කාන්තාවන් දෙදෙනෙකුගේ ඡායාරූපද සහිතව විස්තරයක් දානවා. මේ කාන්තාව සතුරු හමුදාවට බැඳෙන්නට පෙර, අපේ හමුදාව ඇය දූෂණය කල බව සඳහන්, ඇගේ අත් අකුරින්ම ලියන ලද ප්‍රකාශයද පල කරනවා. මේ කාන්තාව බෝම්බ පුපුරවන්නට පෙර සැඟවී සිටි කඳවුරේ තරුණියන් ලෙස කියමින් තවත් දෙදෙනෙකුගේ ප්‍රකාශ දානවා ඒ කඳවුරේ කවදාවත් කාන්තාවන්ට හිරිහැර නොවෙන බවත්, සුළු හිරිහැරයක් හෝ සිදුවුනොත් ඉතා ඉහල දඬුවම් ලැබෙන බවත්, සඳහන් කරමින්.  මේ කරුණු විශ්වාස කරන අපේ හමුදාවේ අයත් සාමාන්‍ය ජනතාවත් විශ්වාස කරන්නට ඉඩ තිබෙනවා මෙය ඇත්ත බව. 
  සෑම දේකම දෙපැත්තක් තිබෙනවානේ.  ඒ තත්වය සයි ඔප්ස් වලටත් පොදුයි. ඉතින් දැන් අපි මේ ලිපියේ අවසානයට ළඟාවෙනවා. ඉතා සංකීර්ණ මාතෘකාවක් ඔබ වෙනුවෙන් හැකි තරම් සරලව සැකසූ බව නැවතත් අවධාරණය කරමින් ලිපිය අවසන් කරනවා.  කලකට ඉහතදී මට අවස්ථාවක් ලැබුනා අපේ රටට පැමිණි ඇමරිකානු යුද හමුදා උපදේශකයන් යටතේ මනෝවිද්‍යාත්මක මෙහෙයුම් පිළිබඳව පාඨමාලාවක් හදාරන්නට. ඒ දැනුම මේ ලිපිය සැකසීමට මහත් පිටුවහලක් වුනා.
  මෙම ලිපියේ ඇතුළත් කර ඇති සියලුම ඡායාරූප Google Images වෙතින් ලබාගත් ඒවාය.  
  මූලාශ්‍ර
My Signature for Blog2013 පෙබරවාරි මස 10 වැනි දින 2326 පැය

01 February 2013

වෙන අය වගේ නෙවෙයි අපි ගහන්නේ ඔලුවෙන් හරිද මල්ලී - (පළමුවැනි කොටස) - Military Psychological Operations- (Part One)


  two skullsඅපි පාසල් යනකාලේ, යාලුවොත් එක්ක තරහවෙලා ගහගන්නකොට ඔලුවෙනුත් ගැහුවා නේද? හැබැයි එහෙම ගැහුවට අපේ ඔලුවත් රිදෙනවා. මම වැඩකාරයෙක් කියලා පෙන්නන්න තමයි ඔලුවෙන් විරුද්ධවාදියාට පහරක් දෙන්නේ. හැබැයි ආත්මාරක්ෂක සටන් වලදී නම් (පින්තුරය ගත්තේ මෙතනින්)ඔලුවෙන් ගැහිලි තිබෙනවා. එය හොඳින් පුහුණුවී කරන දෙයක්. අපිත් එකවරම එහෙම කරන්න ගියොත් කඩෙන් ඔලුවක් ගෙන්න වෙනවා. :D ඒ කියන්නේ ඔලුවෙන් ගැහිල්ල අපි හිතන තරම් පහසු දෙයක් නෙවෙයි කියන එකයි. ඔලුවෙන් ගහනවා කියන එකට තවත් තේරුමක් තියනවා. ඒ තමයි, හොඳින් කල්පනා කර සකස්කරන ලද සැළසුමකින්, තමන්ගේ සතුරෙකුට උගුලක් ඇටවීම. ජීවිතයේ මුහුණ දෙන්න සිදුවන ලොකු ගැටළුවක් විසඳා ගැනීම, තමන් වැටෙන්න යන ලොකු අමාරුවකින් කල්පනාකාරීව බොහොම අමාරුවෙන් ගැලවීම, වැනි දේවල්. යුද්ධයේදීත් මේ ඔලුවෙන් ගැහිල්ල තියනවා. ඒ කියන්නේ, සතුරා වෙත මානසික බලපෑම් ඇතිවෙන ආකාරයෙන් ක්‍රියාත්මක කරන, විවිධ ව්‍යාපෘති තිබෙනවා. ඒ විදිහට තමයි යුද්ධයේදී ඔලුවෙන් ගහන්නේ. අද මම ඔබ සමග කතාකරන්නේ, යුද්ධයේදී කරණ මේ ඔලුවෙන් ගැහිල්ල හෙවත්, ‘මනෝවිද්‍යාත්මක මෙහෙයුම්’ (Psychological Operations) ගැනයි. හමුදා කටයුතු වලදී මෙය කෙටියෙන් හඳුන්වන්නේ ‘Psy Ops සයි ඔප්ස්’ කියලයි. ඉතින් මෙතැන් සිට අපිත් එහෙම කියමු නේද? දැන් මේ බ්ලොග් අඩවිය ඇසුරු කරලා ඔබත් හමුදා කටයුතු ගැන යමක් කමක් දන්නවනේ. 
  gossiping womenමනෝවිද්‍යාත්මක මෙහෙයුම් වලට ඉතා ඈත අතීතයට දිවයන ඉතිහාසයක් තියනවා. ලෝකයේ ඉපැරණි රාජධානි සමය වලදී පවා මනෝවිද්‍යාත්මක මෙහෙයුම් යෙදවූ බවට සාක්ෂි තිබෙනවා. (පින්තුරය ගත්තේ මෙතනින්උම්මග්ග ජාතක කතාවේදී මහෞෂධ පඬිතුමා, සතුරන්ට පෙනෙන ලෙස, බළකොටුවක, ආහාර, දර, ආදිය රැස් කර, බලකොටුව වටකරගෙන, එයට සැපයුම් ලබාදෙන මාර්ග අවහිර කිරීමෙන් ඵලක් නොවන බව, සතුරාට පෙන්වීමත් මනෝවිද්‍යාත්මක මෙහෙයුමක්. අපි සාමාන්‍ය ව්‍යවහාරයේදී කියන ‘ඇම්ඩන් වැඩ’ සමහරක්, මනෝවිද්‍යාත්මක මෙහෙයුම් ලෙස සළකන්න පුළුවන්. සාමාන්‍ය සමාජයේදී මනෝවිද්‍යාත්මක  මෙහෙයුම් වැඩිපුරම කරන්නෙත්, මනෝවිද්‍යාත්මක මෙහෙයුම් වලට ලක්වෙන්නෙත්, කාන්තාවන් කියලයි මටනම් හිතෙන්නේ. හැබැයි කාන්තාවන් මේ ගැන උරණ වී මා විවේචනය කරන්න ඉඩ තිබෙනවා. බොහෝ පෙම්වතියන් තමන්ගේ පෙම්වතාට ‘සයි ඔප්ස්’ දානවා. විශේෂයෙන්, ජංගම දුරකථන, සුවඳ විලවුන්, ඇඳුම් පැළඳුම්, සෙරෙප්පු, සාප්පු යාම, වගේ දේවල් ලබාගැනීම සඳහා. ඒගොල්ලෝ දාන ‘සයි ඔප්ස්’ මම අමුතුවෙන් විස්තර කරන්න අවශ්‍ය නැහැ නේද? සමහර විවාහක කාන්තාවෝත් තමන්ගේ ස්වාමි පුරුෂයාට සයි ඔප්ස් දානවා. ගෙදරදොර යම් යම් වැඩ කරගන්න, වගේම මාසේ පඩිය ගන්න දවස කිට්ටු වෙනකොටත් ටොන් ගණන් සයි ඔප්ස් දානවා. ඇඳේ අනික් පැත්තට හැරිලා නිදාගන්න එකත්, එක්තරා සයි ඔප් එකක් නේද? :D :D  (අත්දැකීමෙන් තමයි කියන්නේ) 
  අතීතයේදී අපේ ගම් වලත් සයි ඔප්ස් තිබුනා. ගමේ රෙදි නැන්දා තමයි ගමට ප්‍රවෘත්ති සපයන්නේ. ඉතින් ගමේ බොහෝ දෙනා ඒ ප්‍රවෘත්ති විස්වාස කරනවා. අහවල් ගෙදර මෙහෙමයි, අහවල් ගෑණු ළමයා මෙහෙමයි, ආදී වශයෙන් දෙන පුවත් ඇත්ත නොවුනත් ඒවා විස්වාස කිරීමෙන් යම් යම් අනිටු ප්‍රතිඵල ඇතිවෙනවා. අපේ රටේ දේශපාලනයේත් සයි ඔප්ස් තියනවා. මේ පාර අහවලා උඩින්ම දිනනවා කියලා මැතිවරණයට පෙර මහා විශාල ප්‍රචාරයක් ගෙනයාමෙන් ඡන්ද දායකයන්ගේ මනසට යම් බලපෑමක් කරන්න පුළුවන්. ඡන්ද අපේක්ෂකයකුගේ චරිතය ඝාතනය වන අන්දමේ ප්‍රචාර ගෙනයාමෙන්ද ඡන්ද දායකයන්ගේ මනසට බලපෑමක් එල්ල කල හැකියි. අපිත් අහවලාට, අපිත් අහවලාට, කියලා පෝස්ටර් ගැහීමත් සයි ඔප් එකක්.
  ‘මනෝවිද්‍යාත්මක මෙහෙයුමක්’ යන්න, හමුදා කටයුතු වලදීනම් බොහොම ගැඹුරු දෙයක්. අපි මුලින්ම බලමු හමුදා මනෝවිද්‍යාත්මක මෙහෙයුම් (Military Psychological Operations) යන්න නිර්වචනය කරන්නේ කොහොමද කියලා. ඔපරේෂන් කියන වචනයෙන්ම පැහැදිලි වෙනවානේ එය ක්‍රියාන්විතයක් කියලා. මෙහිදී මා මුහුණ දෙන බරපතල ගැටලුව තමයි හමුදා ප්‍රකාශනවල සයි ඔප්ස් ගැන තියන මහා ගැඹුරු නිර්වචනය හැකි තරම් සරල බසින් ඔබට දීම. මම එහෙම නොකලොත් ඔබට මේ ලිපි පෙළ එපාවෙනවා සිකුරුයි. ඒ නිසා ඉතා සංක්ෂිප්තව හා සරලව, බොහෝ ගැඹුරු කොටස් අතහැර, එහෙත් අවශ්‍ය අදහස නොබිඳිමින් තමයි, මා ඔබට මේ නිර්වචනය ගෙන එන්නේ.  
space 2
හැබෑටම මොනවද  ‘සයි ඔප්ස්’  කියන්නේ
මනෝවිද්‍යාත්මක මෙහෙයුම් නිර්වචනය 
Definition of Psychological Operations
සයි ඔප්ස් නිර්වචනය ඉස්සරවෙලා එක වාක්‍යයකින් කියන්නම්. ඊට පස්සේ තවදුරටත් විස්තර කියන්නම්. එහෙම හොඳයි නේද? සාමාන්‍යයෙන් බොහෝ නිර්වචන ඉදිරිපත් වෙන්නේ එක වාක්‍යයක් හැටියටනේ.
(සමහර වෙලාවකට හිතෙනවා මොන කෙහෙම්මලකටද මෙච්චර මැරීගෙන මේවා පරිවර්තනය කරමින් ලියන්නේ කියලා. ඒ වුනාට ඔබ යමක් ඉගෙනගෙන දක්වන අදහස් කියවුවාම හිතෙනවා කොයි තරම් මහන්සිවී හෝ තවත් ලියන්න. ලෝකේ හැටි)
23_05  “මනෝවිද්‍යාත්මක මෙහෙයුම් (සයි ඔප්ස්) යනු, කිසියම් නීත්‍යානුකූල රාජ්‍යයක් විසින්, තම දේශපාලන, ආර්ථික, සමාජයීය, අරමුණු සහ අභිමතාර්ථ සාක්ෂාත් කරගැනීම සඳහාත්, තම රාජ්‍ය ආරක්ෂාව, භෞමික අඛණ්ඩතාව, මහජනතාවගේ ආරක්ෂාව වෙනුවෙනුත්, තමන්ට පක්ෂපාතී මහජනතාව, ආරක්ෂක හමුදා මෙන්ම, විරුද්ධවාදී මහජන සංවිධාන හෝ සටන්කාරී සංවිධානයන්හි චින්තනය, අදහස්, ක්‍රියාකාරකම්, (චර්යා රටාව) වෙනස් කිරීම සඳහා බලපෑමක් ඇති කරවීම පිණිස, ආරක්ෂක හමුදා යොදවාගනිමින් දියත් කෙරෙන, යුද්ධමය නොවන වැඩපිළිවල හා ක්‍රියාමාර්ග වේ”  (පින්තුරය ගත්තේ මෙතනින්)
  මෙහෙම කිව්වහමත් බරපතල වැඩියිද? වැඩියි නේ? ඒක තමයි මම මුලින්ම කිව්වේ, නිර්වචනය එක වාක්‍යයකින් කියලා, ඊළඟට විස්තර කරන්නම් කියලා. මම හිතනවා  මේ ලිපිය ගැන ඔබේ අදහස් දැක්වීමේදී ප්‍රශ්න දහස් ගණනකට උත්තර දෙන්ඩ වෙයි කියලා.
  මනෝවිද්‍යාත්මක මෙහෙයුම් කිසියම් නීත්‍යානුකූල රාජ්‍යයකින් කරනවා කියලා පොතේ තිබුනට එල්.ටී.ටී.ඊ. වගේ ත්‍රස්තවාදී සංවිධානත් ඕනෑ තරම් සයි ඔප්ස් කරනවා. ඔබ දිනපතා පුවත් අහනවා බලනවානම්, දන්නවා ඇති, ලෝකයේ විවිධ කලාප වල, රජය සහ රජයට එරෙහි සංවිධාන අතර සිදුවන සටන් වලදී, දෙපැත්තම එකිනෙකාගේ වැරදි කියාගන්න හැටි. මේ තුලත් සයි ඔප්ස් තියනවා. ඒ කියන්නේ දෙගොල්ලන්ගේම අතේ හරි වැරදි දෙකම තියනවා.
ඉතිං මොකටද ‘සයි ඔප්ස්’ කරන්නේ?
ඒ වෙනුවට යුද්ධ කරන්න පුළුවන්නේ.
  හැම දේටම යුද්ධය ඉස්සරහට දාගෙන හරියන්නේ නැහැනේ. පරණ කියමනක් තියනවා ‘උගුලෙන් බැරිනම් හබකෙන්’ කියලා. යුද්දෙන්ම ඔක්කොම කරන්න යාමෙන් වෙන විනාශය බොහොම වැඩියි. ඔක්කොටම කලින් මිනිස්සු හිතන විදිහ වෙනස් කරවන්න පුලුවන්නම් යුද්ධ නොකර අපේ අරමුණ ඉෂ්ඨ කරගන්න පුළුවන්. ඒ නිසා තමයි මෙච්චර මැරීගෙන සයි ඔප්ස් කරන්නේ.
  සයි ඔප්ස් මගින් කරන්නට බලාපොරොත්තුවන දේ මිනිසුන්ගේ සිතට/මනසට යම් බලපෑමක් ඇති කිරීමනේ. ටිකක් හිතලා බැලුවොත්, ලෙඩකට දුකකට කරන ගුරුකම්, තොවිල් පවිල්, ආදියත් එක්තරා ආකාරයක සයි ඔප්ස් කියලා කියන්න පුළුවන්. එමගින් රෝගියාගේ සිතට දැඩි බලපෑමක් එල්ල කර මානසික ප්‍රබෝධයක්/වර්ධනයක් ඇති කිරීමෙන් අවුල්ව ගිය මනස නැවත සැකසීමක් කෙරෙනවා. (හරියට අපි පරිගණකයට reset එකක් දෙනවා වගේ)
  දැන් අපි සයි ඔප්ස් භූමිකාව (role) දෙස තවත් සවිස්තරව බලමු. කිසියම් දේශපාලන දර්ශනයක්, මතවාදයක්, එහෙමත් නැත්නම් වානිජමය අරමුණක් වුනත්, කිසියම් දේශයක වෙසෙන ජනතාවගේ මනසට කාවැද්දවීමට ඉතා සාර්ථකව සයි ඔප්ස් පාවිච්චි කරන්න පුළුවන්. ඔබ දන්නවා අහවල් කිරි බිව්වම, පොඩි එකා, පූසා කොටියා කරන්න තරම් බුද්ධිමත් වෙනවා කියලා කිරිපිටි කාරයෝ අපේ මව් වරුන්ට සයි ඔප්ස් දානවා. එයින් මුලින්ම ඒ මව් වරුන්ගේ චින්තනය වෙනස් වෙනවා. අර දැන්වීම දවසට හැට සැරයක් විතර හැම රූපවාහිනී නාලිකාවේම දැක්කම, අම්මලාගේ චින්තනය වෙනස් වෙනවා. එයින් අර කිරිපිටි කාරයා අම්මලාගේ සිතේ යම් ආරෝපණයක් (induce) ඇතිකරනවා. එමගින් ඔවුන්ගේ චර්යාවේ (behavioural pattern) වෙනසක් ඇති කල හැකියි. ඒ කියන්නේ මෙතෙක් පොඩි එකාට දුන්න කිරි වෙනුවට වහාම “පූසා/කොටියා” වර්ගයේ කිරි මිලදී ගැනීමට පටන්ගන්නවා. ඒ තමයි චර්යාවේ වෙනස.
  අපි තමයි මේ රටේ මෙතෙක් බිහිවූ හොඳම රජය, අපි තමයි මහජනතාවට ඉහලම සුබසාධනය කරන්නේ, අපි තරම් විශිෂ්ඨ, උත්කෘෂ්ඨ, ආණ්ඩුවක් ලෝකයේ තවත් නැත යන සංකල්පය කිසියම් රටක ජනතාවගේ මනසෙහි ආරෝපණය කරන්න අවශ්‍යනම් ත්‍රිවිධ හමුදාවත් ආධාර කරගෙන සයි ඔප්ස් කරන්න පුළුවන්.  
හමුදාවක් මගින් කරන සයි ඔප් එකකට උදාහරණයක් කියන්නම්. මෙය ඇත්ත කතාවක් නොවේ. නමුත් මතක තබාගන්න සයි ඔප්ස් වලදී මෙවැනි කතා දහස් ගණනින් නිර්මාණය කරනවා. එහි අධ්‍යක්ෂණය, රඟපෑම, වැනි කොටස්වල දක්ෂතාව මත තමයි බලාපොරොත්තුවන ප්‍රතිඵලය ලැබෙන්නේ.  
  ඔන්න ත්‍රස්තවාදී කාන්තාවක් ඇවිත් මරාගෙන මැරෙන බෝම්බයක් පත්තු කරගෙන මහා විනාසයක් කරලා මිය යනවා. දැන් හානියට පත් පාර්ශ්වයත් මේකට ප්‍රති ප්‍රහාරයක් දෙන්න ඕනේ. ඔන්න ඔයවගේ වැඩ වලදී තමයි ‘ඔලුවෙන් ගහන්න’ ඕනේ. දැන් අපි ලෝකේ පුරා මහා ප්‍රචාරයක් ගෙනියනවා අර මරාගෙන මැරෙන බෝම්බ කාරියගේ අතේ තිබුන බෑගයක් හමුවුන බවත්, එහි තිබුණු ලිපියක, තමා සැඟවී සිටි කඳවුරේ සිටි ත්‍රස්තවාදී නායකයා තමන්ව බලහත්කාරයෙන් දූෂණය කල බව, තමන් දැන් මාස 4 ක ගැබිනියක් බව, මේ ගැන සංවිධානයේ නායකත්වයට පැමිණිලි කලොත් තමන්ගේ පවුලම මරාදමන බවට අර නායකයා තර්ජනය කල බව, සඳහන් බවත්, (ඇගේ පශ්චාත් මරණ පරීක්ෂනයෙදී ගැබිණි බව හෙළිවූ බවත් කියනවා. කියන්නේ දොස්තර නෙවෙයි අපි නේ) තමන්ගේ දෙමවුපියන් වෙත ලියා ඇති මේ ලිපියේ, මෙය තමාගේ අවසන් ලිපිය බවත්, මේ මරාගෙන මැරෙන මෙහෙයුමට තමන්ව බලහත්කාරයෙන් යොමු කලේ මේ රහස් හෙළිවේ යයි බියවූ අර නායකයා බවත්, මේ ගැන සංවිධානයේ ඉහල නායකත්වයට පැමිණිලි කරන ලෙස තම දෙමවුපියන්ගෙන් ඉල්ලාසිටින බව සඳහන් බවත්, අපි ප්‍රචාරය කරනවා. දැන් මොකද වෙන්නේ. වැඩේ හරියට පත්තු වුනොත්, අර සංවිධානයේ ඉහල නායකත්වය විසින් අර බෝම්බකාරිය සිටි කඳවුරේ නායකයාව මරනවා ස්ථිරවම. ඔන්න ඕකට තමයි කියන්නේ අර මොකාගේද මාළු උගේ ඇඟේම තියලා කපනවා කියලා. හැබැයි මේවා නිකම් සිල්ලර සයි ඔප්ස්. නියම සයි ඔප්ස් මීට වඩා බරපතලයි. 
  මා නැවතත් අවධාරණය කරනවා මේ මාතෘකාව ඉතා දීර්ඝ විස්තර සහිත සංකීර්ණ මාතෘකාවක් බව. එමෙන්ම කොටස් ගණනාවකට ඇදී ගියොත්, අසාර්ථක වේදෝ යන සැකයත් තිබෙනවා. ඔබේ ප්‍රතිචාර අනුව ඊළඟ කොටස් සකසන්නම්. (එහෙම කියන එකත් මේ යකාගේ සයි ඔප් එකක්ද දන්නේ නැහැ කියලා කියන්න නම් එපා හොඳේ… :D ) ඊළඟ කොටසෙන් හමුවෙමු.   
My Signature for Blog2013 පෙබරවාරි මස 01 දින 0001 පැය

25 January 2013

අර ඉන්නේ …අර,….කෝ…? ඇයි යකෝ අර ඉන්නේ අතන – දෙවැනි කොටස – Judging Distance and Target Indication – Part Two


a-polish-soldier-allied-with-u-s-army-europes-173rd-airborne-brigade-combat-tea  පසුගිය දිනවල මා අසනීපව සිටි බැවින් නියමිත කාලය තුළ මේ ලිපිය ප්‍රකාශයට පත්කරන්නට නොහැකි වුනා. ඒ ගැන කණගාටු වන අතර මට සුවය පතමින්, ඉතා ඉවසීමෙන් මේ ලිපිය බලාපොරොත්තුවෙන් සිටි ඔබ සැමට මෙය සාදරයෙන් පිළිගන්වනවා.
පින්තුරය ගත්තේ මෙතනින්
 ’අර ඉන්නේ අර’ ලිපියේ  පළමුවැනි කොටසෙන් ඔබට මූලික අවබෝධයක් ලැබෙන්නට ඇති, භූමියේ පිහිටි වස්තුවක් තවත් කෙනෙකුට පෙන්වාදෙන්නේ කොහොමද කියන එක පිළිබඳව. එහිදී මා ඔබට එවැනි වස්තුවක්,  ඉලක්කයක් ලෙස ප්‍රකාශ කරන හැටිත් පැහැදිළි කර දුන්නා. නමුත් ඔබෙන් බහුතරය, හමුදා සාමාජිකයන් නොවන බැවින්, ඔබට කිසිවිටකත් එවැනි ඉලක්කයකට වෙඩි තියන්න ඉඩ නොලැබෙන නිසා, වෙඩි තැබීමේ පැත්ත අමතක කර, කිසියම් වස්තුවක් පෙන්වීමේ තවත් ක්‍රම ගැන, තවදුරටත් අද සාකච්ඡා කරමු. සාමාන්‍යයෙන් මෙවැනි ලිපි වලදී මා හැකිතරම් උත්සාහ කරන්නේ පාරිභාෂික වචන අඩුකොට, එදිනෙදා ව්‍යවහාර භාෂාවේ එන වචන හැකිතරම් දීමටයි. මා සිතන්නේ එවිට මේ ලිපිවලට පදනම් වන හමුදා ප්‍රකාශන වල තිබෙන, ‘දැඩි හමුදා ගතිය’ තරමක් හෝ අඩුවී, සාමාන්‍යකරණය වනු ඇතැයි කියායි.
 භූමියේ ඇති ඉලක්ක පෙන්වීමේ තවත් ක්‍රම කීපයක් තිබෙනවා. මේවායින් සමහරක් ප්‍රධාන ක්‍රම සමග සම්බන්ධකර භාවිත කෙරෙන අධාරක ක්‍රම ලෙසයි යොදාගන්නේ. නමුත් ඔබෙන් සමහර අය පළමුවරට මේ තොරතුරු කියවන නිසා ඒ සියල්ල වෙන වෙනම දැක්වීමට මා අදහස් කරනවා. මීළඟ ක්‍රමය ඉතා සරලයි. හැබැයි භාවිතයේදී ඉතා කල්පනාවෙන් කල යුතුයි. මතකතබාගන්න, යුද්ධයේදී වැරදීමක් වෙනවා කියන්නේ, මහා විනාශයකට මුලපිරීමක් විය හැකියි. මේ සරල ක්‍රමය හඳුන්වන්නේ වරහන් ක්‍රමය (Bracketing Method) යනුවෙන්. 
space 2
වරහන් ක්‍රමය –  Bracketing Method  
17-10
පින්තුරයේ මුල් පිටපත ගත්තේ මෙතනින්

මේ පින්තුරයේ ඉන්න සොල්දාදුවාට, අර ඈත පෙනෙන ගස් යට ඉන්න සතුරකු, ඉලක්ක කරගන්න සිදුවෙනවා යයි සිතන්න. දැන් ඔහුට ඒ ඉලක්කයට ඇති දුර නිශ්චය කිරීමට ඇති එක ක්‍රමයක් තමයි වරහන් ක්‍රමය. ඔහු කලයුත්තේ මෙයයි. තමන් සිටින ස්ථානයේ සිට ඉලක්කයට ඇති උපරිම දුර මීටර්/යාර මෙපමණකැයි ඔහු මුලින්ම හොඳින් සොයාබලා තීරණය කලයුතුයි. ඊළඟට එලෙසම එම ඉලක්කයට ඇති අවම දුර මෙතෙකැයි තීරණය කලයුතුයි. දැන් ඒ උපරිම දුර සහ අවම දුර යන දෙක එකට එකතු කර දෙකෙන් බෙදීමෙන් ඉලක්කයට ඇති දුර මෙතෙකැයි යන සාධාරණ නිශ්චය කිරීමක් ලැබෙනවා. උදාහරණය:-  උපරිම දුර මීටර් 400 යි. අවම දුර මීටර් 300 යි. එකතුව මීටර් 700 යි. දෙකෙන් බෙදුවිට මීටර් 350 යි. ඒ අනුව ඉලක්කයට ඇති දුර මීටර් 350 සේ සලකා තම තුවක්කුවේ කුරුමානම සැකසිය යුතුයි. ඊළඟ ක්‍රමය හඳුන්වන්නේ භාග ක්‍රමය යනුවෙන් (halving method)
space 2
භාග ක්‍රමය – (Halving Method)
භාග ක්‍රමය වරහන් ක්‍රමයේ ප්‍රතිවිරුද්ධ පැත්ත වගේ පෙනෙනවා. මෙයත් ඉතා සරල ක්‍රමයක්. මෙහිදී කරන්නේ තමන් සිටින ස්ථානය සහ ඉලක්කය අතර හරි මැද පිහිටි කිසියම් වස්තුවක් වෙත මුලින්ම දුර නිශ්චය කිරීමයි. ඉන්පසු එය දෙකෙන් වැඩි කිරීමන් ඉලක්කයට ඇති දුර මෙතෙකැයි නිගමනය කරනවා.
bberryaug12 419පින්තුරයේ මුල් පිටපත ගත්තේ මෙතනින්
  මේ රූපය අදාළ කාරණය පැහැදිලි කිරීම සඳහා ඉදිරිපත් කරන්නක් මිස, නිශ්චිත පරිමාණයකට අනුව සකස් කර නැති පින්තුරයක් බව විශේෂයෙන් සඳහන් කරනවා.
space 2
යතුරු ක්‍රමය – Key Ranging Method
  කිසියම් නිශ්චිත දුරක් මූලික මිනුමක් හෙවත් යතුරක් ලෙස යොදාගෙන දුර මැනීමේ ක්‍රමයක් ද තිබෙනවා. එය හඳුන්වන්නේ ‘යතුරු ක්‍රමය – Key Ranging Method’ යනුවෙන්. උදාහරණයක් වශයෙන්, අපි දන්නවා, පාපන්දු පිටියක් මීටර් 100 ක් පමණ දිග සහ මීටර් 50 ක් පමණ පළල බව. ඉතින් අප ඉදිරිපිට පාපන්දු පිටියක් තිබේ යයි සිතන්න. අපට දුර නිෂ්චය කිරීමට අවශ්‍ය වස්තුව, එම පිටියට පසු පසින්, තරමක් දුරින්, පිහිටා තිබෙනවා යයි සිතන්න. දැන් අපිට පුළුවන් අපි සිටින තැනත් ඒ වස්තුවත් අතර මැද ප්‍රදේශය පාපන්දු පිටිය මෙන් කොපමණ ගුණයක් ආවරණය කරනවාදැයි ගණනය කරන්න, අර පාපන්දු පිටියේ දිග හෝ පළල යතුරක් ලෙස යොදාගනිමින්. නමුත් එක කරුණක් මෙහිදී පැහැදිලිව මතක තබාගන්න මේ ක්‍රමය මීටර් 400 කට වඩා දුර ඉලක්ක නිශ්චය කිරීමට ගැලපෙන්නේ නැහැ. වෙනත් වචන වලින් කියනවානම්, මීටර් 400 කට වඩා ඔබ්බෙන් තිබෙන ඉලක්ක මේ ක්‍රමයෙන් නිවැරදිව නිශ්චය කරන්නට බැහැ.  
2012-09-30_08-10-48_4652
පින්තුරයේ මුල් පිටපත ගත්තේ මෙතනින්. මෙම පින්තුරය පරිමාණයකට අනුව සකස්කර නැති බව සලකන්න.
space 2
ඔරලෝසු ක්‍රමය – Clockray Method
  පසුගිය ලිපිය කියවූ සමහර අය මේ ක්‍රමය ගැන මතක් කර තිබුනා. තවත් සමහරු එය ඉගෙනගන්නට උනන්දුව දක්වා තිබුනා. හොඳයි එහෙනම් මෙන්න ඉලක්ක පෙන්වීම සඳහා වඩාත් ජනප්‍රිය ඒ ඔරලෝසු ක්‍රමය. මෙහිදී ඉලක්කය පෙන්වීම සඳහා උපයෝගී කරගන්නේ මනඃකල්පිත ඔරලෝසු මුහුණතක්, අප ඉදිරිපිට පරිසරයේ හොඳින් කැපීපෙනෙන ස්ථානයක රැඳවිමෙන්. මෙය වර්තමානයේ බහුලව යොදාගන්නා සංඛ්‍යාංක (Digital) ඔරලෝසුවක් නොව පැරණි ප්‍රතිසම (Analog) (හරිද වචනය?) ඔරලෝසුවක්. එමෙන්ම ඒ ඔරලෝසුවේ වෙලාව දක්වන ඉලක්කම් තිබුනත් ‘කටු’ (hands) පිහිටා නැහැ. කටු සවිවන, ඔරලෝසු මුහුණතේ හරි මැද, ලක්ෂ්‍යයක් ලෙස, අපිට අවශ්‍ය කැපී පෙනෙන ස්ථානය මත පිහිටවනවා.
village
  මේ රුපය ඇසුරෙන් මම ඉතිරි කරුණු ඔබට පැහැදිලි කරන්නම්. මේ ක්‍රිකට් පිටියට පසුපසින් විශාල නිවසක් තිබෙනවා. මෙම නිවසේ දුම් කවුළු කීපයක් තිබෙනවා. හොඳින් පරීක්ෂාකර බැලුවොත් ඔරලෝසුවේ 9 ඉලක්කමට පසුපසින්, ඔරලෝසුවේ හරි මැද, ඔරලෝසුවේ 3 ඉලක්කම අසල, 3 ඉලක්කමට ටිකක් ආසන්නව, 3 ඉලක්කමට ටිකක් ආසන්නව තරමක් පහලින්, සහ 3 ඉලක්කමට තරමක් ඈතින් දුම් කවුළු පිහිටා තිබෙනවා. නමුත් මේ සියලු දුම් කවුළු අතරින් වඩාත් කැපී පෙනෙන්නේ සුදුපාට විශාල දුම් කවුළුවයි. ඒ නිසා මම මට අවශ්‍ය ඉලක්කය පෙන්වීමට ඔරලෝසුව පිහිටුවන්නේ ඒ සුදුපාට විශාල දුම් කවුලුවෙයි. දැන් සිතන්න, 3 ඉලක්කමට නැගෙනහිර පැත්තෙන් ඇති, දුඹුරු පැහැති, විශාල දුම් කවුළුවෙහි සැඟවී සිටින සතුරකු, මට නිරීක්ෂණය වුනා කියා. මම ඒ බව ඔරලෝසු ක්‍රමය අනුව ඔබට කියන්නේ මෙහෙමයි. “ඉදිරියේ ඇති විශාල ගොඩනැගිල්ල”, “සුදුපාට ලොකු දුම් කවුළුව”, “3 වෙලාව”, “දුඹුරු පාට ලොකු දුම් කවුළුවේ සතුරා”. (මම ඊතලයක් ඇඳ තිබෙන්නේ 3 වෙලාව යන්න ඔබට පැහැදිලි කිරීම සඳහායි)  ඊළඟට තිබෙන්නේ ඔබ කලයුතු අභ්‍යාසයක්. මොහොතකට සිතන්න මේ ක්‍රීඩා පිටිය හිස්ව තිබෙන්නේ කියා. ඉදිරි භූමියේ ඇති කාර් දෙකෙන් එකක් අසල බිම සතුරන් දෙදෙනෙක් ඉන්නවා. (කී දෙනෙක් හිටියත් කියන්නේ ‘සතුරා’ කියලයි) හොඳයි දැන් ඔබ මට පෙන්වාදෙන්න ඒ සතුරන් දෙදෙනා සිටින තැන ඔරලෝසු ක්‍රමය අනුව.  ඉහත මා දක්වා ඇති ආකාරයට විස්තර කල යුතුයි. (ක්‍රීඩා පිටිය හිස්ව තිබෙන බව සිතන්න කිව්වේ එහි ක්‍රීඩා කරන අතරේ ඒ හරහා යන ලෙස වෙඩි තියන්න බැරි නිසා) 
  ඉලක්කය පෙන්වූවාට පසු එයට ඇති දුර නිශ්චය කර වෙඩි තැබීමේ අණ නිකුත්වන තුරු සිටිය යුතුයි. ප්‍රහාරක කණ්ඩායමේ නායකයා තමයි කියන්නේ වෙඩි තබන ආකාරය. (තනි උන්ඩද, පොකුරු වෙඩිද ආදී වශයෙන්)
  අප අවට පරිසරයේදී පුද්ගලයකු කිසියම් නිශ්චිත දුරකදී අපට පෙනෙන්නේ කෙසේද යන්න දැන සිටීමත් වැදගත්. එවිට ඔබට සිතාගන්න පුළුවන් ඒ පුද්ගලයා ආසන්න වශයෙන් ඔබට කොපමණ දුරකින් ඉන්නවාද කියා. පහත දැක්වෙන සටහන බැලීමෙන් ඔබට එය පැහැදිලි වෙනවා ඇති.
100
කිසියම් පුද්ගලයකු ඔබට මීටර් 100 ක් පමණ දුරුන් සිටින විට ඔහු හොඳින් හඳුනාගත හැකියි. මුහුණේ ඇති ලක්ෂණ, සමේ වර්ණය, අතේ තිබෙන දේවල් ආදිය පැහැදිලිව පෙනෙයි.
200
මීටර් 200 දී පුද්ගලයාගේ මුහුණේ වර්ණය පෙනේ. එහෙත් පැහැදිලිව හඳුනාගැනීමට නොහැකිය. අතේ තිබෙන්නේ මොනවාද කියා එක්වරම කීම අපහසුය.
pia-flight-swat-670-afpපින්තුරය ගත්තේ මෙතනින්
මීටර් 300 දී, එය මිනිස් රූපයක් බව, හැඩය අනුව ප්‍රකාශ කළ හැකිය. වැඩි විස්තර දැක ගැනීමට අපහසුය. මෙවැනි ලිපි වලින් ඔබේ දැනුමට යමක් එක්වන්නේනම් එය මට මහත් සතුටක්.
මීළඟට මා සිතා සිටිනවා ‘යුද්ධයේදී ඔලුව පාවිච්චි කිරීම’ ගැන ලිපියක් ලියන්න. එය තරමක් ගැඹුරු කරුණු වලින් යුක්තයි. නමුත් වර්තමානයට අතිශයින් ගැලපෙන ලිපියක්. බලාපොරොත්තුවෙන් සිටින්න.
My Signature for Blog2013 ජනවාරි මස 25 වැනි දින 2246 පැය

17 January 2013

ඩෙංගු මාරයාගෙන් ගැලවුනෙමි


dengue_mosquito-health-careපසුගිය ජනවාරි පළමුවැනිදා මමත් මගේ බිරිඳත් කුරුණෑගල මහජන පොළ වෙත ගියේ ගිනි ගණන් වුනත් එළවලු වර්ග දෙක තුනක්වත් මිලදී ගන්නටය. පොලේ ඇවිදිද්දී අපි දෙදෙනාගේම මදුරුවන් දෂ්ඨ කළා මට හොඳටම මතකය. එයට හේතුව ඒ මහා දවාලේ මදුරුවන් දෂ්ඨ කිරීම නිසයි. කුරුණෑගල මහජන පොළ ආශ්‍රිතව ඇත්තේ කුණුවූ එළවළු ගොඩවල් බහුල, අත්හැර දමන ලද වෙල්යායකි. එහි සෑම විටම ජලය රැඳී පවතී. මදුරු ජනපද ලක්ෂ ගණනක් එහි පහසුවෙන් ජීවත්වනු නොඅනුමානය.
පින්තුරය ගත්තේ මෙතනින්
අපේ නිවාසය අවට භූමියද සම්පූර්ණයෙන්ම මදුරුවන්ගෙන් තොර ප්‍රදේශයක් නොවන බව අවංකව කිවයුතුය.  එක මදුරුවකු හෝ බෝවන්නට එහි ඉඩකඩ නැතුවා නොවේ. මේ නිසා ඩෙංගු මදුරුවකු මටත් බිරිඳටත් දෂ්ඨ කලේ හරියටම පොලේදීද නැතහොත් ගෙවත්තේදීද යන්න ස්ථිරවම කිව නොහැකිය. ජනවාරි 3 වැනිදා අපි දෙදෙනාටම  උණ, ඇඟපත වේදනාව, හිසරදය, ආහාර අරුචිය ඇතිවිය. වහාම කුරුණෑගල රෝහලට ගොස් ලේ පරීක්‍ෂාවක්ද කර බෙහෙත් ගතිමු. ඩෙංගු ගැන සැකයක් අප දෙදෙනාගේම රුධිර පරීක්ෂණ වාර්තාවේ නොතිබුණි.
ජනවාරි 5 වැනිදා පහන් වනවිට මගේ බිරිඳ අසාධ්‍ය තත්වයට පත්වුයෙන්, රෝහලට ඇතුළු කලෙමි. දවල් වනවිට බාහිරින් රුධිර පරීක්‍ෂාවක් කරගෙන එන ලෙස රෝහලෙන් ලද උපදෙස් අනුව කරන ලද පරීක්ෂාවෙන් ඩෙංගු බව සනාථ විය. එදින බිරිඳ රෝහලේ නවත්වා ආපසු නිවස වෙත කාරය පදවද්දී මට පැහැදිලිව වැටහුනේ මගේ ශරීර ශක්තිය පිරිහෙන බවත්, වරින්වර ඇස් නිලංකාර වන්නාක් මෙන් දැනෙන බවත්ය. ඉතා කල්පනාවෙන් කෙසේ හෝ නිවසටම වාහනය දක්කාගෙන එන්නට හැකිවිය. වහාම මිතුරෙකුට එන්නට කියා ඔහුගේ රථයෙන් ගොස් රෝහලේ නැවතුනෙමි. මටත් ඩෙංගු වැළඳී ඇති බව සනාථ විය.
ey4යුද්ධය පටන්ගත්තේ එතැන්සිටය. අප දෙදෙනාගේම ළඟ ආවතේව කරුවකු සිටිය යුතු බව රෝහලෙන් දන්වන ලදී. ලොකු දුව ඈ සේවය කරන ප්‍රාදේශීය ලේකම් කාර්යාලයෙන්
පින්තුරය ගත්තේ මෙතනින්
අවසරයක් ගෙන මගේ බිරිඳ ළඟ නැවතුනත්, යටත්පිරිසෙයින් දින දෙකකටවත් වරක් සේවා ස්ථානයට යායුතු විය. ඒ වෙනුවට මගේ බිරිඳ අසල රැය පහන් කරන්නට ආවේ අවසන් වසර ෛවද්ය ශිෂ්‍යාවක වශයෙන් අතිශයින් කාර්ය බහුල තත්වයක සිටින මගේ බාල දියණියයි. ඇය දවසේ වැඩ නිමකර, සවස කොළඹින් පිටත්වී, රෑ වනවිට කුරුණෑගල රෝහල වෙත එයි. රාත්‍රිය ඇගේ මව අසළ ගතකර, පාන්දර 5 බසයෙන් යලි කොළඹ ගොස් ඉගෙනීමේ කටයුතු (සමහරවිට සායන කටයුතු) වල යෙදෙයි. 
  මට ආවතේව කරන ලද්දේ වෙනත් රෝගීන් අසල සිටි සත්ගුණවත් පුද්ගලයන් විසිනි. කුරුණෑගල මහ රෝහලේ අංක 2 වාට්ටුව සියලු නවීන පහසුකම් වලින් සමන්විත පුංචි දිව්‍යලෝකයකි. එහි කාර්ය මණ්ඩලය දෙවිවරුන් හා දිව්‍යාංගනාවන් ගෙන් සමන්විතය. රෝගීන්ට සැළකීම අන්තිම ඉහලය.
  වස බිවු රෝගියකු මහ රෑ රෝහල වෙත ගෙන එන ලදී. ඔහු අමු කුණුහරපෙන් හෙදියන්ට සංසර්ගාරාධනා කරයි. වෛද්‍ය වරුන් මරණ බවට තර්ජනය කරයි. එහෙත් කාර්ය මණ්ඩලයේ කිසිවකුගේ මුහුණේ ඉරියව්වක්වත් වෙනස් නොවෙයි. දින දෙකක ප්‍රතිකාර වලින් අර ගොබිලා සුවවිය. ඉන්පසු ඔහු වාට්ටුවේ සිටියේ වාලධිය පශ්චාද්භාගයේ ගසාගත් සුනඛයකු මෙනි. මගේ බිරිඳට සෙවන වූ අංක 7 වාට්ටුවනම් අපායකි. කාර්ය මන්ඩලයනම් ඉතා ඉහල සේවයක් ලබාදෙයි. හැබැයි අපි දෙදෙනාටම වැටී සිටින්නට ඇඳන් ලැබුනේ දැන හැඳුණුම්කම් නිසාය.
  අපේ අසල්වැසි සියලුදෙනා අපේ පවුලම පෝෂණය කරන්නට තරම් මහාත්මා ගුණයෙන් යුක්තවිය. අප දෙදෙනාටම නොයෙක් පෝෂ්‍යදායක අහාරපාන තුන්වේලටම සපයමින්, දියණියන් දෙදෙනාටද ආහාරපාන ලබාදෙමින්, ඔවුහු කාලවේලාව බෙදාගෙන උදේ දවල් රෑ රෝහල වෙත පැමිණියහ. අපේ ගමේ පන්සලේ හාමුදුරුවෝ එක්‌ දිනක් රෑ බෝවී මා බලන්නට වැඩම කර, ආපසු වැඩියේ, මා දෙනෙතට කඳුළු නංවමින්, උන්වහන්සේගේම වියදමින් රැගෙන ආ ආප්ප, උන්වහන්සේගේම අතින් මට කවා, තේ ද පෙවීමෙන් අනතුරුවය.  දින 5 ක්‌ රෝහලේ ගත කිරීමෙන් අනතුරුව කරන ලද රුධිර පරීක්ෂණ දෙකකදී රුධිරයේ අයහපත් තත්වය නොකඩවා යහපත් අතට හැරෙන බව සනාථ වුයෙන් අප දෙදෙනාට රෝහලෙන් පිටවීමට හැකිවිය. නමුත් ඇඳෙන් නොබැස සිටින ලෙස දැඩි වෛද්‍ය අවවාද ලැබුණි. එහෙත් නිවසේදී වුවද අප දෙදෙනාවම එකවර බලාගැනීම අපහසු කාර්යයක් බැවින්, මා ටික දිනක් මගේ සහෝදරියකගේ නිවසේ නැවතීමටත්, බිරිඳ සහ ලොකුදුව නිවසේ නතරවීමටත් තීරණය විය. මා ආපසු නිවස වෙත පැමිණියේ ඊයේ (16) දිනදීය.
  තවමත් අපේ කුදු මහත් ප්‍රවාහන කටයුතු, (දින කීපයකට වරක් කලයුතු රුධිර පරීක්ෂාව සඳහා යාම වැනි දැන්නම් අපි දෙන්නාගේම platelets count එක 250000 මට්ටමේ ඇත) පමණක් නොව කෑමබීම පවා සැපයෙන්නේ අසල්වැසියන්ගෙනි. ප්‍රතික්ෂේප කළහොත් තරහවෙන තරමට ඔවුහු අප වෙත බැඳී සිටිති. කවදා කෙසේ මේ ණය ගෙවන්නද? “පතිරූප දේස වාසෝච” යන්න මනාව වැටහෙන්නේ දැන්ය.
  ඇබ්බැහිය කොහොම නවත්වන්නද? සහෝදරියගේ නිවසේදී ඇගේ පුතාගේ පරිගණකයෙන් ජංජාලයේ ටිකක් සැරිසැරුවෙමි. අක්කා තව පොඩ්ඩෙන් අර කොල්ලාවත් මරා, ඒ අහිංසකයාගේ පරිගණකයත් පොළොවේ ගසනවාය. හෙට අනිද්දා සිට සුපුරුදු ලෙස ලිවීම පටන්ගත යුතුය. එහෙත් මගේ පරිගණකයට මොකක්දෝ වී ඇති බව පෙනේ. ඒකටත් ඩෙංගුද දන්නේ නැහැ. :D
කම්කරුවකු යොදවා මුළු ගෙවත්තම කාන්තාරයක් වන තරමට එළි පෙහෙළි කරවුයෙමි.
“ඇයි යකෝ අර ඉන්නේ” ලිපියේ දෙවැනි කොටස ඉක්මනින් දෙන්නම්. ඉවසීමෙන් ඉන්න.
My Signature for Blog2013 ජනවාරි මස 17 දින 1401 පැය

04 January 2013

අර ඉන්නේ…අර, ….කෝ…? ඇයි යකෝ අර ඉන්නේ අතන – පළමුවැනි කොටස – Judging Distance and Target Indication – Part One


Target Indicationඔයා කොහොමද සෙනග ගොඩක් මැද්දේ ඉන්න ඔයාගේ අර, ‘අරයව’ ඔයාගේ යාලුවෙකුට පෙන්වන්නේ? ඉහත මාතෘකාවේ කියලා තියන විදිහට නේද? හැබැයි ඉතින් ‘අර මල් මල් ගවුම ඇඳලා ඉන්නේ, කළු කලිසම ඇඳලා ඉන්නේ’ වගේ කිව්වොත්, යාලුවගෙන් හොඳ හරුප තමා අහගන්න වෙන්නේ. මොකද පිරිසක් මැද මල් මල් ගවුම්, කළු කලිසම් විශාල ගණනක් තියෙන්න පුළුවන්. ඒ අතරින් අර නිශ්චිත පුද්ගලයා සොයාගන්න අමාරුයි ඔහුගේ මුහුණුවර නොදන්නා කෙනෙකුට.
අපේ ජීවිතයේ බොහෝවිට අපට කරන්නට සිදුවන දෙයක් තමයි පරිසරයේ පිහිටි, ස්ථිර වස්තු හෝ චලනය වන වස්තු එහෙමත් නැත්නම් දුර සිටින පුද්ගලයන්, තවත් කෙනෙකුට පෙන්වාදීම. එමෙන්ම ඒ දේවල් පිහිටා තිබෙන්නේ ඔබ සිටින තැන සිට කොපමණ දුරකින්ද කියන එක අනුමානයෙන් සිතාගැනීම හෝ ප්‍රකාශ කිරීම. මෙහිදී අපි පාවිච්චි කරන්නේ සාමාන්‍යයෙන් සමාජ සම්මත ක්‍රම විනා, ශාස්ත්‍රීය/තාක්ෂණික පදනමක් අනුව සැකසූ ක්‍රමවේදයක් නොවෙයි. නමුත් යුද බිමේදී ‘අර ඉන්නේ යකෝ’ ක්‍රමය හරියන්නේ නැහැ. ඒ නිසා 100% ක් නිවැරදි ක්‍රමවේදයක් අවශ්‍ය වෙනවා, යුද බිමේදී යම් දෙයක් (ඉලක්කයක්) පෙන්වාදීම සඳහා. එය හඳුන්වන්නේ ‘දුර නිශ්චය කිරීම සහ ඉලක්ක පෙන්වීම’ හෙවත්, ‘Judging Distance and Target Indication’ යනුවෙන්. අද අපි කතා කරන්නේ, එය කරන්නේ කොහොමද කියන එක ගැනයි.
මේ මොනවද කියන්නේ, ඉලක්කයට ඇති දුර පෙන්වන දුර දක්න, ‘Range Finders’ චන්ද්‍රිකා තාක්ෂණය ‘Global Positioning System = GPS’ වැනි අති නවීන ක්‍රම තිබෙන නිසා, පැරණි ක්‍රම මොකටද? කියා ඔබ සිතන්නට පුළුවන්. නමුත් හොඳින් මතකතබාගන්න. ඔය යන්තර සූත්තර කොයි මොහොතේ අවුල් වෙයිද, ක්‍රියා විරහිත වෙයිද, කියලා සක්කරයාගේ පුතා වයිමාට වත් (අර අපේ අධ්‍යාපනය කන එක්කෙනා නෙවේ :D )  කියන්න බැහැ. යුදබිම මැදදී, රේන්ජ් ෆයින්ඩර් එකක හෝ ජී.පී.එස්. එකක බැටරි බැස්සොත්, ‘පොඩ්ඩක් හිටපං බැටරි දාගෙන එනකං’ කියලා සතුරාට ‘වච්චිල්’ එකක් දෙන්න බැහැනේ. :D :D   ඒ නිසා තමන්ගේ මොළය පාවිච්චි කර, දුර නිශ්චය කිරීමේ ක්‍රම සහ ඉලක්ක පෙන්වීමේ ක්‍රම, අදටත් ලෝකයේ සෑම හමුදාවකම පාහේ උගන්වනවා. මේවා ඉගෙන ගැනීම ඔබටත් ප්‍රයෝජනවත්. හිතන්න ඔබ වනයේ සංචාරයක ගියා කියලා. ඒ වගේ අවස්ථාවක ඇතිවියහැකි සිදුවීම් මොනවාද? මම විස්තර කරන්නේ නැහැ. ඈතින් ඉන්න අලියෙක් ඔබේ පිරිසේ ඉන්න අනික් අයට පෙන්වීමේ සිට, ඔබ අතරමං වුනොත් ඉදිරි භූමියේ ඈතින් පෙනෙන භූමි ලක්ෂණ වලට ඇති දුර නිශ්චය කරගැනීම දක්වා, සියල්ල ගැන සිතාබලන්න.
මේ ලෝකයේ තිබෙන වඩාත්ම විශ්මයජනක දේ මොකක්ද කියා, කවුරුහරි මගෙන් ඇහුවොත්, මම නම් දෙන උත්තරේ ‘මිනිස් මොළය’ කියන එකයි. මොළය පාවිච්චි කරලා නොවැ ඔය යන්තර සූත්තර ඔක්කොම හදලා තියෙන්නේ. ඉතින් ඒ මොළයෙන් ඉතා හොඳින් හිතුවොත් කරන්න බැරි දෙයක් නැහැ. මොළයෙන් කල්පනා කරලා තමයි ලෝකයේ තියන අති විශිෂ්ඨතම තුවක්කුව හදන්නේ. නමුත් ඒ තුවක්කුවට බැහැනේ හිතලා වෙඩි තියන්න. ඒ තුවක්කුව පිටිපස්සේ ඉන්න හොඳ මොලයක් හා හොඳ පුහුණුවක් තියන සොල්දාදුවා තමයි ඒ තුවක්කුවේ නිසි ප්‍රයෝජනය ගන්නේ.
space 2
කොහොමද ඉතින් ඈත තියන දේ වලට ඇති දුර මැනගන්නේ?
ඒ සඳහා ක්‍රම කීපයක් තියනවා. අපි එකින් එක ගෙන බලමු. හැබැයි මෙතැනදී මම හමුදා පොතේ තියනදේ ඒ විදිහටම කියන්නේ නැහැ. නමුත් මූලික සිද්ධාන්තය වෙනස් කරන්නෙත් නැහැ. ඔබට ගැලපෙන විදිහට සුළු වෙනස්කම් පමණයි කරන්නේ. මුලින්ම කියාදිය යුතු කරුණු කීපයක් තියනවා. භූමියේ පිහිටි යම් යම් වස්තු (වස්තූන් නෙවෙයි වස්තු/හේතූන් නෙවෙයි හේතු) නිරීක්ෂණය කිරීමේදී ඒවා වෙත ඇත්තවශයෙන්ම ඇති දුර අඩුවී හෝ වැඩිවී (ඈත්වී හෝ ළංවී) පෙනීමට බලපාන යම් යම් සාධක තිබෙනවා. මේ නිසා මුලින්ම ඒ සාධක ඔබට පැහැදිලි කරදීම සුදුසුයි මා හිතනවා. පහත දැවෙන්නේ ඒ සාධක.space 2
 (1) යම් වස්තුවක් ළංවී පෙනීමට බලපාන සාධක.
  • ඉතා දැඩි ආලෝකයක් එම වස්තුව මත පතිතවී තිබීම සහ/හෝ සූර්යයා නිරීකෂකයාට පසුපසින් දීප්තිමත්ව පිහිටා තිබීම.
  • අප නිරීක්ෂණය කරන වස්තුව, එය පිහිටි පරිසරයේ හාත්පස පිහිටි අනෙක් වස්තු වල විශාලත්වයට වඩා සාපේක්ෂව, විශාල එකක් වීම.
  • එකී වස්තුව නිරීක්ෂකයා සිටින ස්ථානයට වඩා උස් භූමියක පිහිටා තිබීම.
space 2
(2) යම් වස්තුවක් ඈත්වී පෙනීමට බලපාන සාධක
  • ආලෝක තත්වය දුර්වලවීම හෝ සූර්යයා නිරීක්ෂකයාගේ මුහුනට (දෙනෙතට) ආලෝකය වැටෙනසේ පිහිටීම.
  • අප නිරීක්ෂණය කරන වස්තුව, එය පිහිටි පරිසරයේ හාත්පස පිහිටි අනෙක් වස්තු වල විශාලත්වයට වඩා සාපේක්ෂව, කුඩා එකක් වීම.
  • නිරීක්ෂකයා නිම්නයක් වැනි භූමියක් හරහා හෝ කෙලින් පිහිටි වීදියක ඈත කොණ වැනි ස්ථානයක පිහිටි දෙයක් නිරීක්ෂණය කිරීම.
  • නිරීක්ෂකයා බිම දිගාවී සිට අදාළ වස්තුව නිරීක්ෂණය කිරීම.
space 2
1. ඉඳුරාම දුර ප්‍රකාශ කිරීම – Direct Method
 ඇත්තටම අපි පාවිච්චි කරන සාමාන්‍ය සරළ ක්‍රමය හමුදා කටයුතු වලදීත් පාවිච්චි කරනවා. ඒ කියන්නේ අපේ අනුමාන කිරීමේ හැකියාව යොදාගනිමින්, කෙලින්ම හිතෙන දුර මැනගනීම. මෙතන ඉඳලා අතනට මීටර් මෙච්චරක් ඇති කියලා අපි හිතන්නේ. අන්න ඒ ක්‍රමය. නමුත් මේ ක්‍රමය හමුදාවේදී පාවිච්චි කිරීමට නම් ඒ දුර 99% ක් වත් නිශ්චිත විය යුතුයි. ඒ දුර කලින් මැනබලා තිබේනම් හෝ එහි තිබෙන යම් වස්තුවකට මෙතන සිට ඇති දුර මෙපමණකැයි කලින් දන්නේනම් පමණක් තමයි මේ ක්‍රමය භාවිත කරන්නේ සහ සාර්ථක වන්නේ. මේ ක්‍රමය බොහෝවිට යොදාගන්නේ ස්ථිරව පිහිටවා තියන කඳවුරක ආරක්ෂක බංකරයක්, ස්ථිරව පිහිටුවා තිබෙන මාර්ග බාධකයක්, එවැනි හමුදා ස්ථානයක්, (Military Installation) ආරක්ෂා කරගැනීම සඳහායි. සාමාන්‍යයෙන් අපේ ඉදිරිපිට භූමිය එතරම් බාධක වලින් තොරව තිබේනම් අංශක 180 ක කෝණයක් ඔස්සේ ඉදිරි භූමිය දැක ගන්න ලැබෙනවා. අපි මේ ආකාරයට දකින්නට ලැබෙන ඉදිරි භූමිය (අංශක 180 ක් හෝ ඊට අඩු වුනත්) ’වෙඩි චාපය – arc of fire’ ලෙස නම් කරනවා. මේ ස්ථානයේ සන්නද්ධ ආරක්ෂක සෙබළකු යොදවන විට ඔහුට මුලින්ම ඔහුගේ වෙඩි චාපය කුමක්ද යන්න කියා දෙනවා. නැතහොත් ඒ ස්ථානයේ අදාළ විස්තර දැක්වෙන කාඩ් පතක් සවිකර තිබෙනවා. එහි පෙන්වනවා මේ ස්ථානයේ සිට භූමියේ තිබෙන වෙනස් නොවෙන වස්තු (ලොකු තනිගහක්, තනිව පිහිටි නිවසක්, ඇන්ටෙනා කුළුණක්, වැනි) වෙත ඇති දුර කොපමණද කියා. ඉතින් මේ භූමියේ සතුරක දුටුවොත් අපිට පුළුවන් අර ස්ථිර වස්තුවකට ඇති දුර අනුව සතුරා සිටින තැනට ඇති දුර ඉතා ආසන්න වශයෙන් මැනගන්න.
arc of fire
  ආසන්න ස්ථාන දෙකක සිටින සෙබළුන් වෙත, වෙඩි චාපය ලබාදීමේදී, එම වෙඩි චාප වල වම් සහ දකුණු සීමා, ඊළඟට සිටින සෙබලාගේ වෙඩි චාපයෙන් කොටසක් සමග එක මත එක වැටෙනසේ (උපරිපතනය -Overlap) සකස් කරනවා. එවිට මුළු ඉදිරි භූමියම වෙඩි වලින් ආවරණය වෙනවා. ඔබ දන්නවා ඇති රාත්‍රී කාලයේදී ක්‍රීඩා පිටියක් ආලෝකවත් කිරීමේදී එක විදුලි පහනකින් ලැබෙන ආලෝක කවය ඒ වටා පිහිටි අනෙක් විදුලි පහන් වල ආලෝක කවය සමග උපරිපතනය වන ආකාරයටයි සකසන්නේ. වෙඩි චාපයත් ඒ වගේ. හැබැයි වෙඩි තැබීමේදී හඳුනාගත යුතුයි මේ යන වෙඩි ඊළඟ මුර සෙබළාගෙන්ද නැද්ද කියා. නැත්නම් ඔහේ හිටු කියලා දෙන්නා දෙන්නාට වෙඩි තියාගන්නවා. පහුගිය ඊලාම් යුද්ධයේ මුල් අවස්ථා වලදී එහෙම වුනා. පස්සේ පුහුණු කටයුතු වැඩි දියුණුවීමත් සමගම ඒ තත්වය මග හැරුනා. දැන් අපි බලමු මේ වෙඩි චාපය තුළ පිහිටි විවිධ වස්තු අනුව ඉලක්කයට ඇති දුර ප්‍රකාශ කරන හැටි.direct method
ඉහත රූපයේ ඔබට පෙනෙනවා වෙඩි චාපයේ එක් එක් සීමාවන් නම් කර ඇති ආකාරය. දැන් ඔබට පැහැදිලි වෙනවා ඇති, එහිදී වමට සහ දකුණට කාල, භාගය, තුන්කාල, ලෙස සීමා ලකුණු කර තිබෙනවා. එමෙන්ම කලින් දුර මැන සලකුණු කරගත් ස්ථිර වස්තු ද තිබෙනවා. ඒ ස්ථානයක සතුරකු සිටියොත් කෙලින්ම ඉලක්කය ප්‍රකාශ කරන්න පහසුයි. මේ රූපයේ ඇන්ටෙනා කුළුණක්, ගෙයක් සහ ගසක් තිබෙනවා. ඒවාට ඇති දුර ද සඳහන් වෙනවා. දැන් මෙන්න මෙහෙමයි ඒ එක් එක් ඉලක්කය ප්‍රකාශ කරන්නේ. මුලින්ම තමාගේ ඉදිරි අක්ෂය (Axis of Fire) කුමක්ද යන්න පැහැදිළි කළයුතුයි. ‘මා මුහුණ යොමුකර සිටින අක්ෂය මගේ ඉදිරි අක්ෂයයි’ යන වැකිය කිව යුතුයි. එහි සිට තමයි වම් සීමාවේ සිට දකුණු සීමාව දක්වා සියල්ල තීරණය වන්නේ. එවිට තමයි ඔබ පෙන්වන ඉලක්කය වෙනත් අය විසින් තේරුම් ගන්නේ.  
1. දෙසීයයි, (මීටර් කියලා කියන්නේ නැහැ) අඩක් වම, ඇන්ටෙනා කනුව, සතුරා.
2. තුන්සීයයි, කාලක් වම, තනි ගෙය, සතුරා.
3. දෙසිය පනහයි, අඩක් දකුණ, තනි ගස, සතුරා.
 හොඳයි ඉතින් සතුරා හරියටම ඔය තැන් වලටම එන්නේ නැහැනේ. වෙඩි චාපයේ අනෙක් තැන් වලත් ඉන්න පුළුවන්නේ. එතකොට මොකද කරන්නේ? ප්‍රශ්නයක් නැහැ. අපි හිතමු ඉදිරි අක්ෂය සහ කාලක් දකුණ අතර තමයි සතුරා ඉන්නේ කියලා. ඉතින් එතකොට අර තනි ගස අනුව දුර හිතන්න පුළුවන්, ඉදිරි අක්ෂය සහ කාලක් දකුණ අතර කියලා කිව්වාම හරි. මේක ගස්කොලන්, කුඩා ගල් කඳු, හුඹස්, විශාල පඳුරු, වැනි දේවල් සහිත පරිසරයක් බව අමතක කරන්න එපා. ඒ අනුව ආසන්න වශයෙන් ඉලක්කය ප්‍රකාශ කිරීම අමාරු නැහැ.
  එක්තරා ආධුනික සෙබළුන් පිරිසකට මේ පුහුණුව පිලිබඳ දේශනය අවසන් කර, ප්‍රායෝගික කොටස සඳහා භූමිය වෙත ගෙනගියා. මෙහිදී කෝප්‍රල්, සැරයන්, වගේ නිළ වල අය තමයි ප්‍රායෝගික කොටස් මුලින්ම කියාදෙන්නේ. වරදිනකොට දෙක තුනක් වදිනවා. නැත්නම් පිනුම් ගස්සනවා (forward roll) එක ආධුනිකයෙක් ටිකක් බයට සහ කලබලයට පත්වෙලා හිටියේ. ඔහු තමන්ගේ උපදේශක කෝප්‍රල්ට ඇහෙන්න ඉලක්කය කිව්වා. දුර, දිශාව කිව්වා. පඳුරක් තිබුණා, ඒ පඳුරේ සතුරා ඉන්න බව කියන්න ඕනෙවුනේ. අර ආධුනික සෙබළා මහ හඬින් කිව්වා……………’සතුරේ පඳුරා’ කියලා.  :D :D :D
  මීට වඩා දුරට ගියොත් ටිකක් නීරස වෙනවා. ඒ නිසා ඉතිරි කොටසට ගිහින් අනෙක් ක්‍රම ඉගෙන ගනිමු.  
My Signature for Blog2013 ජනවාරි මස 04 වැනි දින 2110 පැය

01 January 2013

සුබ නව වසර අපිම උදාකරගනිමු


සෑම වසරකම ආරම්භයේ, අපට හැම පැත්තෙන්ම අහන්න දකින්න ලැබෙන්නේ, ‘සුබ නව වසරක් වේවා’ යන පැතුමනේ. එහි වරදක් නැහැ. නමුත් පැතුම සඵල කරගන්න අපි මොනවහරි කරන්න ඕනේ නේද? ඒ නිසා මට හිතෙන හැටියට කළහැකි, කලයුතු, කාර්යයන් සහිතව මම අලුත් අවුරුද්ද වෙනුවෙන් හැම දෙනාගෙන්ම ඉල්ලන දේ (මමත් උත්සාහ කරනදේ) පහත දක්වනවා.
annuncement
My Signature for Blog2013 ජනවාරි මස 01 වැනි දින 0001 පැය
.emoWrap { position:relative; padding:10px; margin-bottom:7px; background:#fff; /* IE10 Consumer Preview */ background-image: -ms-linear-gradient(right, #FFFFFF 0%, #FFF9F2 100%); /* Mozilla Firefox */ background-image: -moz-linear-gradient(right, #FFFFFF 0%, #FFF9F2 100%); /* Opera */ background-image: -o-linear-gradient(right, #FFFFFF 0%, #FFF9F2 100%); /* Webkit (Safari/Chrome 10) */ background-image: -webkit-gradient(linear, right top, left top, color-stop(0, #FFFFFF), color-stop(1, #FFF9F2)); /* Webkit (Chrome 11+) */ background-image: -webkit-linear-gradient(right, #FFFFFF 0%, #FFF9F2 100%); /* W3C Markup, IE10 Release Preview */ background-image: linear-gradient(to left, #FFFFFF 0%, #FFF9F2 100%); border:3px solid #860000; -moz-border-radius:5px; -webkit-border-radius:5px; border-radius:5px; box-shadow:0 4px 6px rgba(0,0,0,0.1),0 1px 1px rgba(0,0,0,0.3); -moz-box-shadow:0 4px 6px rgba(0,0,0,0.1),0 1px 1px rgba(0,0,0,0.3); -webkit-box-shadow:0 4px 6px rgba(0,0,0,0.1),0 1px 1px rgba(0,0,0,0.3); box-shadow:0 2px 6px rgba(0,0,0,0.1),0 1px 1px rgba(0,0,0,0.3); font-weight:normal; color:#333; } .emoWrap:after { content:""; position:absolute; bottom:-10px; left:10px; border-top:10px solid #860000; border-right:20px solid transparent; width:0; height:0; line-height:0; }