මේ දෙන්නව හඳුනාගන්න කැමතිද? G3A3 and HK MP 5

මෙම බ්ලොග් අඩවියේ ඉතිහාසයේ පළමුවැනි වතාවට, එකම දිනකදී, පාඨකයන් වැඩිම දෙනෙකු විසින් කියවනලද ලිපිය මෙන්ම, කෙටි කාලයක් තුළ වැඩිම පාඨක සංඛ්‍යාවක් විසින් කියවනු ලැබූ ලිපිය.

(ලිපිය පළ කළ පළමුවැනි දිනය තුළ පමණක්, කියවන ලද පාඨක සංඛ්‍යාව 703 යි. මුල්ම දින හතර තුළ පමණක් කියවන ලද පාඨක සංඛ්‍යාව 1799 යි) ඉහත සටහන 2013/05/23 දින ඇතුළත් කරනලදී.

මෙම ලිපිය පළකළ 2013/05/19 දින සිට 2013/05/29 දක්වා දින 10 තුළ ලිපිය කියවන ලද පාඨක සංඛ්‍යාව 3122 යි.

ලෝකයේ තිබෙන විවිධ ගිනි අවි වර්ග ගැන මා ඔබට සෑහෙන තරම් කරුණු කියාදී තිබෙනවා. නමුත් කවදාවත් එක පුද්ගලයකුට බැහැ ලෝකයේ තියන සියලුම ගිනි අවි ගැන තම ජීවිත කාලය තුලදී ලියා අවසන් කරන්න. එයට හේතු කීපයක් තියනවා.

• අපි නොදන්නා, රහසිගතව තබාගෙන ඇති, ගිනි අවි වර්ග සමහර රටවල තිබෙනවා.විවිධ අලුත් ගිනි අවි මෝස්‌තර, අපි නොසිතන තරම් වේගයෙන්, නිරතුරුව බිහිවෙනවා. මේ නිසා වාර්ෂිකව අළුත් ගිනි අවි පිළිබඳ ජර්නල්, (තාක්ෂණික විස්තර පොත්) නිකුත් වෙනවා. සමහර ගිනි අවි වර්ග දැක තිබුනත්, ඒවා ගැන තාක්ෂණික තොරතුරු රහසිගත නිසා, ලබාගන්නට බැහැ. ප්‍රධාන මෝස්තරය එක වුනත්, ලෝකයේ සමහර රටවලදී, හැඩය විවිධ වෙනස්කම් වලට භාජනය කල අවි තිබෙනවා.

  සාමාන්‍යයෙන් මම ඔබ සමග බොහෝවිට සාකච්ඡා කරන්නේ, ඔබ අපේ රටේ පාරතොටේ යනවිට, අපේ ආරක්ෂක හමුදා අතේ තිබෙනු දකින්නට ලැබෙන අවි ගැනයි. ඒ අවි ගැන ඔබට තිබෙන කුතුහලය එයින් තරමක් දුරට සංසිඳේ යයි මා සිතනවා. හැබැයි කෙනෙක් කියන්න පුළුවන් මම වක්‍රව අවි පුහුණුවක් දෙනවා කියලා. නමුත් හොඳින් මතක තබාගන්න. බයිසිකලයක් අතින්වත් අල්ලලා නැති කෙනෙකුට පුළුවන්ද, බයිසිකල් පැදීම ගැන දීර්ඝ විස්තරයක් කියවා, එක වරම බයිසිකල් පදින්න. බයිසිකලය දැකලා තියන නිසාත්, මිනිස්සු බයිසිකල් පදිනවා දැකලා තියන නිසාවත් සමහරවිට සෑහෙන සාර්ථකත්වයක් ලබන්න පුළුවන් වෙයි. නමුත් ගිනි අවි එහෙම නෙවෙයි. ඔබ දන්නවා ක්‍රියාදාම සහ යුද්ධ චිත්‍රපටිවල තුවක්කු හරඹ පෙන්වන හැටි. නමුත් ඒ දර්ශන වල ඉතා කලාතුරකින් තමයි පෙන්වන්නේ,

• වෙඩි තැබීම සඳහා මුලින්ම තුවක්කුව සූදානම් කරන ආකාරය,
• පතරොම් හිස්වූ විට පුරවන ආකාරය,
• වෙඩිතැබීමකදී තුවක්කුව හිර වුනොත් එය නිවැරදි කරගන්නා ආකාරය,
• තුවක්කුවේ සියලු කොටස්වල ක්‍රියාකාරිත්වය, ආදිය.

  මා ඔබට කියාදෙන කරුණු වලදීත්, මා ඉතා ගැඹුරට නොයන්නේ, මගේ පරමාර්ථය ඔබට සරල අවබෝධයක් ලබාදීම විනා, අවි පුහුණු පන්තියක් පැවැත්වීම නොවන නිසයි. කවුරුන් හෝ මෙවැනි සටහනක් මගින් එසේ අවි පුහුණුවක් දෙන්නට උත්සාහ කරනවානම්, එය හරියට තැපෑලෙන් පිහිනීම උගන්න උත්සාහ කිරීමක් වගේ. කවදාවත්,

• 1. අවිය,
• 2. පුහුණුවන්නා,
• 3. පුහුණු උපදේශක,

  එකතැන නොසිට අවි පුහුණුවක් ලබාදිය නොහැකියි. වීඩියෝවක් මගින් පෙන්නුවත්, අවිය අතට ගත්තමයි රඟේ තේරෙන්නේ. “තේරුනේ……දැන් තමයි”  හොඳයි ,එහෙමනම් අද මා රැගෙනවිත් තිබෙන අවි එළියට ගන්නම්. අපි මුලින්ම මේ දෙකෙන් ලොකු අවිය ගැන ඉගෙනගනිමු.

G3A3 ප්‍රහාරක රයිෆලය – G3A3 Assault Rifle

  මේ අවියේ උපත 1959 වර්ෂය තරම් ඈතට දිවයනවා. විශේෂත්වය වන්නේ මෙය අදටත් ලෝකයේ සමහර රටවල පාවිච්චි කරන අවියක් වීමයි. මේ අවිය අපේ යුද හමුදාවට 1980 දශකයේ දී ලැබී තිබුනා. තෝරාගත් සමහර රෙජිමේන්තු වලට පමණක් නිකුත්කළ බවයි මගේ මතකය. නමුත් එය හමුදාව තුළ ‘ජනප්‍රිය’ අවියක් වුනේ නැහැ. එයට හේතු කීපයක් තිබුණා.

• මේ අවිය සෑහෙන්න බරයි.
• අපිට ලැබුණු මෝස්තරය අර T 56 අවිය වගේ මිට (බට් එක) නවන්න හෝ හකුලන්න බැහැ) ඒ නිසා එහෙ මෙහෙ ගෙනයාමේදී ටිකක් කරදරයි.
• හරියට ගැස්සෙනවා. ඒ වගේම හෙණ ගහනවා වගේ ලොකු හඬක් දෙන්නේ වෙඩි තියනකොට.
• අපිට ලැබුන මෝස්තරය අර්ධ ස්වයංක්‍රීයව වෙඩි තැබීමේ හැකියාව පමණක් තිබුන මෝස්තරයක්. එය යුද්ධ භූමියට ගැලපෙන්නේ නැහැ. (ඒ වනවිට එල්.ටී.ටී.ඊ. සංවිධානය T 56 අවිය පාවිච්චි කරන්න පටන් අරං තිබුණේ)
• ඒ දිනවලම T 56 අවිය අපටත් ඇවිල්ලා තිබුණේ. ඉතිං එයාගේ ‘වැඩ කිඩ’ දැක්කම මෙයා එපාවෙන එක අහන්නත් දෙයක්ද?
• විවිධ තුවක්කු වර්ග රාශියක් නඩත්තු කිරීම අපිවගේ දුප්පත් හමුදාවකට නොගැලපෙන නිසා G3A3 අවිය භාවිතයෙන් ඉවත් කළා.

  හැබැයි මේ තුවක්කුව ස්නයිපර් තුවක්කුවක් ලෙස ඉතා හොඳ අවියක්. නමුත් ඒ කාලේදී ඒ අදහස ක්‍රියාත්මක කෙරුනේ නැහැ. මේ තුවක්කුවේ බටයේ (බැරල්) දිග සහ තුවක්කුවේ ශක්තිමත් නිමාව අනුව නම්, මෙය ඉතා හොඳ ස්නයිපර් අවියක් බව කියන්න පුළුවන්. අපිට ලැබී තිබුන අර්ධ ස්වයංක්‍රීය මෝස්තරය පාකිස්ථානයේ නිෂ්පාදිත එකක්. නමුත් ඇත්තටම අපට අවශ්‍යව තිබුණේ පූර්ණස්වයංක්‍රීයව වෙඩි තැබීමේ පහසුකමත් තිබෙන තුවක්කුවක්. මේ තුවක්කුවේ මුල්ම නිෂ්පාදනය කර තිබෙන්නේ ජර්මනියේ ‘හෙක්ලර් ඇන්ඩ් කොච්  – Heckler & Koch’ සමාගම විසින්. ඒ සමාගම මෙය නිපදවා තිබෙන්නේ පූර්ණ ස්වයංක්‍රීය අවියක් ලෙසයි. 

තුවක්කුවේ තාක්ෂණික විස්තර මෙන්න

(මේ කියන්නේ අපේ හමුදාවේ පාවිච්චි කල මෝස්තරය ගැනයි)

• තුවක්කුවේ කැලිබරය…………………………………..මිලිමීටර් 7.62 x 51
• තුවක්කුවේ දිග……………………………………………මිලිමීටර් 1025 යි
• තුවක්කු බටයේ දිග ……………………………………..මිලිමීටර් 450 යි
• තුවක්කුවේ බර (මැගසිනය රහිතව)…………………..කිලෝග්‍රෑම් 4.40 යි
• පතරොමක බර……………………………………………ග්‍රෑම් 24 යි
• වෙඩි තැබීමේ දුර සකසනයේ පාඨාන්ක………………මීටර් 200,300,400,
• විනාඩියකට වෙඩි තැබිය හැකි පතරොම් ගණන (අර්ධ ස්වයංක්‍රීය) 100 – 150
• වෙඩිල්ලක සාපේක්ෂ ප්‍රවේගය …………තත්පරයකට අඩි 2458 – 2624 අතර
• සඵල වෙඩි දුර…………………………………………….මීටර් 500 යි

තුවක්කුවේ කොටස් සහ වෙඩි තැබීමට සුදානම් කිරීම

  

  මේ තුවක්කුවේ මැගසිනයට පතරොම් 20 ක් දමන්න පුළුවන්. මීට කලින් ඔබ තුවක්කුවක මැගසිනය ගලවන සවි කරන හැටි ඉගෙනගෙන තියනවා. ‘මැගසින් කැච්’ එකක් තියෙන්නේ, මැගසිනය තුවක්කුවෙන් ගලවා ඉවත් කර ගැනීමට බව ඔබ දන්නවා. මා හිතනවා මේ තුවක්කුව හඳුනාගැනීම සඳහා මේ විස්තරය ප්‍රමාණවත් වේයැයි කියා. ප්‍රශ්න තිබෙනවානම් විමසන්න. අපි දැන් යමු ඊළඟ අවිය වෙත. එය නම් බොහොම ජනප්‍රිය අවියක්. G3 A3 අවියෙන් වෙඩිතබන අවස්ථාවක් පහත වීඩියෝවෙන් බලන්න.

මේ වීඩියෝවෙන් පෙන්නන්නේ අර්ධ ස්වයංක්‍රීය G3 A3 තුවක්කුවෙන් වෙඩි තියන ආකාරයයි. බලන්න සෑම වෙඩිල්ලක් සඳහාම ට්‍රිගරය නැවත නැවත මිරිකිය යුතුයි.

මීළඟට බලමු සම්පූර්ණ ස්වයංක්‍රීය G3 A3 අවියෙන් වෙඩි තියන හැටි. බලන්න මේ ශක්තිමත් පුද්ගලයා කොච්චර ගැස්සෙනවද කියා. මේ තුවක්කුව හරියට ගැස්සෙන බව මා ඉහත කිව්වා මතකද?

HK MP 5 ස්වයංක්‍රීය තුවක්කුව

  මේ තුවක්කුව තරම් ජනප්‍රිය, මේ තුවක්කුව තරම් විවිධ මෝස්‌තර සහිත, මේ තුවක්කුව තරම් බහුලව භාවිත කරන, තවත් තුවක්කුවක් නැති තරම් කියලා කීමේ වරදක් නැහැ. එමෙන්ම මේ තුවක්කුව තවමත් විවිධ වෙනස්කම්, නවීකරණය කිරීම් වලට භාජනය වන තුවක්කුවක්.  මේ ලිපිය ලිවීම සඳහා කරුණු සොයා බැලීමේදී මට පෙනීගියා HK MP මෝස්‌තර 30 ක් පමණ තිබෙන බව. එයින්ම පෙනෙනවා නේද මේ අවිය කොයිතරම් වැදගත් ද කියන එක. අපේ හමුදාවේ විශේෂ බලකාය සහ කමාන්ඩෝ රෙජිමේන්තුව මේ තුවක්කුවේ මෝස්‌තර කීපයක් පාවිච්චි කරනවා. කෙසේ වෙතත් මා මෙහිදී මුල්තැන දෙන්නේ HK MP 5 මෝස්තරයට පමණයි. ඔබ දැන් දන්නවනේ HK කියන්නේ Heckler & Koch නමැති, ගිනි අවි හදන සමාගමේ නම කියලා. එතකොට MP කියන්නේ මොකක්ද? හාපෝ……අපිටනම් මේ MP කියන වචනය දැන් එපාවෙලා නේද තියෙන්නේ අපේ MP ලාගේ වැඩ නිසා. හැබැයි මෙතන කියන්නේ ජර්මන් භාෂාවේ වචනයක්. ඒ වචනය තමයි Maschinenpistole මෙය ජර්මන් භාෂාවේදී උච්ඡාරණය කරන්නේ ‘මෂීන්පිස්තෝල’ යනුවෙන්. ඒ කියන්නේ ඉංග්‍රීසි භාෂාවෙන් Machine Gun කියන එකයි. (තුවක්කු නිසා භාෂාවත් ඉගෙනගන්න වෙනවා) මේ තුවක්කුවේ උපත සිදුවී තිබෙන්නේ 1964 තරම් අතීතයේදී. 1966 දී තමයි වෙළඳපොළට ඇවිත් තියෙන්නේ. මේ තුවක්කුවේ මුල් නිෂ්පාදන සැලසුම් කීප වතාවක්ම ‘හෙක්ලර් ඇන්ඩ් කොච්’ සමාගමෙන් හොරකම් කර තිබෙනවා. ඒ නිසා වෙන්න ඇති මෙපමණ මෝස්‌තර අද තිබෙන්නේ.

  මුලින්ම තුවක්කුවේ තාක්ෂණික තොරතුරු පිළිබඳව අවබෝධයක් ලබාගනිමු.  පහත දැක්වෙන්නේ ඒ තාක්ෂණික තොරතුරුයි.

• කැලිබරය …9 x 19 මිලිමීටර්
• තුවක්කුවේ දිග (ස්ථිර බට් එක සහිත මෝස්තරය)…සෙ.මී. 68 යි (අඟල් 26.77 යි)
• හැකිලිය හැකි බට් එක සහිත මෝස්තරයේ දිග…සෙ.මී.66 යි (අඟල් 25.98 යි)
• අවියේ බර (ස්ථිර බට් එක සහිත මෝස්තරය)…කිලෝග්‍රෑම් 2.54 යි (රාත්තල් 5.59යි)
• මැගසිනය රහිතව අවියේ උස …සෙ.මී.62 යි (අඟල් 10.2 යි)
• විනාඩියකදී වෙඩි තැබිය හැකි පතරොම් ගණන …800 යි  (මෝස්තරය අනුව අඩු වැඩි වේ)
• උණ්ඩ පිටවීමේ සාපේක්ෂ ප්‍රවේගය …තත්පරයකට මීටර් 400 යි (අඩි 1312 යි) (මෝස්තරය අනුව අඩු වැඩි වේ)
• ප්‍රතිඵලදායි වෙඩි තැබීමේ දුර …මීටර් 200 යි (අඩි 656 යි)
• මැගසින් වර්ග …පතරොම් 15, 20, 30, 32, සාමාන්‍ය මැගසින් හෝ පතරොම් 100 රවුම් මැගසිනය

තුවක්කුවේ කොටස් මේ රූපයෙන් බලන්න.(සරල හැඳින්වීමක් පමණි)

HK MP වර්ගයේ ප්‍රධාන මෝස්‌තර දෙක තමයි මේ.

අපේ හමුදාවේ පාවිච්චි කරන වෙනත්  HK MP මෝස්‌තර

  මේ මෝස්තරයේ විශේෂත්වයක් තිබෙනවා. රතු ඊතල වලින් පෙන්වන්නේ එයයි. බලන්න සේෆ්ටි ලිවරය Single කියන තැනට දැම්මොත් ට්‍රිගරය මිරිකන එක වරකට එක උණ්ඩයක් පමණයි පිටවෙන්නේ. හරියට අර්ධ ස්වයංක්‍රීය තුවක්කුවක් වගේ. ඊළඟට Three Burst කියන තැනට සේෆ්ටි ලිවරය දැම්මොත් ට්‍රිගරය මිරිකන වාරයක් පාසා උණ්ඩ තුන බැගින් පිටවෙනවා. අන්තිමට තියෙන්නේ Full Auto Mode එක. එතනට සේෆ්ටි ලිවරය දැම්මම මැගසිනයේ පතරොම් අවසන් වනතුරු  සම්පූර්ණ ස්වයංක්‍රීය ක්‍රමයට වෙඩි තියන්න පුළුවන්.  පහළින්ම තියන සුදුපාට තැනට සේෆ්ටි ලිවරය දැම්මම, තුවක්කුව ලොක් වෙනවා.

 දැන්නම් විස්තර කතාකරා ඇති නේද. මේ අවියේ එක එක මෝස්‌තර ගැන කියන්න ගියොත් ලිපි දහයක් විතර ලියන්න වෙනවා. ඔබට එපාවෙයි එකම අවිය ගැන එච්චර විස්තර ලිව්වම. ඉතුරු දේවල් වීඩියෝ වලින් බලමු.

තුවක්කු පිස්තෝල වලට සයිලන්සර් සවි කරන්න පුළුවන් බව මම ඔබට කියලා දුන්නනේ ‘තුවක්කුවක කට වැසීම’ ලිපියෙන්. මෙන්න බලන්න සයිලන්සරය සහිත HK MP 5 W මෝස්තරයේ තුවක්කුවකින් වෙඩි තියන හැටි.  

තුවක්කුව ගලවන්න හයිකරන්න ඉගෙනගත්තොත් නරකද? එහෙනම් මේ වීඩියෝව බලන්න.

මේ වීඩියෝවෙන් පෙන්වන්නේ එළිමහනේ කෙරෙන වෙඩි තැබීමක්

තුවක්කුව දෙස පමණක් බලනු

කොහොමද ‘තුවක්කුව’ ? +++ නේද?      ඉතිං අදට මා ඔබෙන් සමුගන්නවා. ප්‍රශ්න තියනවනම් අහන්න.  ඉදිරි කාලයේදී තවත් මෙවැනි තුවක්කු ගැන කතා කරමු.  

මේ ලිපියේ සමහර පින්තුර අනතර්ජාලය වෙතින්ද, තවත් සමහර පින්තුර මගේ පුස්තකාලයෙන්ද ලබාගත් ඒවාය.

2013 මැයි මස 19 වැනි දින 1404 පැය

ලංකාවේ දිගම, එල්ලෙන (සංගිලි) පාලම – The Longest Suspension Bridge in Sri lanka

  මම 1979 සිට 2000 දක්වා පදිංචිව සිටියේ සබරගමු පළාතේ, කෑගල්ල දිස්තිරික්කයට අයත්, රුවන්වැල්ල ප්‍රදේශයේ. අදටත් ඒ ප්‍රදේශය සමග තියන සබඳතා පෙර ලෙසම පවතිනවා. අවම වශයෙන් මාස දෙක තුනකට වරක්වත් ඒ පැත්තේ යැවෙනවා. වෙන එකක් තියා, මගේ ජංගම ගිණුම තවම තිබෙන්නේ, රුවන්වැල්ල ලංකා බැංකු ශාඛාවේ. ඔබ දන්නවා ඇති රුවන්වැල්ල කියන්නේ ඓතිහාසික කෝට්ටේ, සීතාවක, මහනුවර යන රාජධානි සමයයන්හිදී  බොහොම ප්‍රචලිත නගරයක් බව. කෝට්ටේ රාජධානියේ සිට සීතාවක හරහා කන්ද උඩරටට යන මාර්ගය වැටී තිබුනේ මේ අසළින්. මේ නගරය ආශ්‍රිතව කැළණි ගඟේ තිබෙන ඓතිහාසික තොටුපොළ අතීතයේදී කැළණි ගඟ ඔස්සේ ගමන් කල යාත්‍රා නැවැත්වීමේ ප්‍රධාන තොටුපොළ වුනා. ලන්දේසීන් පවා එය පාවිච්චි කර තිබෙනවා. ඒ වගේම රුවන්වැල්ල නගරයේ අද පොලිස් ස්ථානය සහ ප්‍රාදේශීය සභා ගොඩනැගිල්ල අතර ප්‍රදේශයේ තිබෙනවා, ඉපැරැණි ලන්දේසි බළකොටුවක කොටස්. ක්‍රි.ව. 1817 දී තමයි මෙය ඉදිකර තිබෙන්නේ. රුවන්වැල්ල ගැන සංක්ෂිප්ත විස්තරයක් මෙතනින් බලන්න පුළුවන්. මේ පින්තුරයේ පෙනෙන්නේ බලකොටුවේ දොරටුවයි.

රුවන්වැල්ල නගරය අසළින් ගලා බසින කැළණි ගඟ, නගරයට එක්කරන්නේ, වචනයෙන් විස්තර කළ නොහැකි තරම් සිරියාවක්.

  ඊයේ මගේ ලොකුදුවට හදිසි රාජකාරි අවශ්‍යතාවක් පැන නැගුනා, රුවන්වැල්ලට යන්න. ඉතින් අද (2013/05/15) මමත්, බිරිඳත්, ලොකු දුවත්, රුවන්වැල්ලට ගියා. ලොකු දුවගේ අවශ්‍යතාව ඉටුවනතුරු නගරයේ රැඳී සිටි මම, හිතවතුන් සමග කතාකරමින් නගරය පුරා ඇවිද්දා.

  ප්‍රධාන පාර පළල් කිරීම සඳහා, (සබරගමු පළාතේ ප්‍රධාන නගර දෙක වන රත්නපුර සහ කෑගල්ල නගර දෙක යා වෙන මාර්ගය) නගරයේ වෙළඳසල් සහ වෙනත් ගොඩනැගිලි රාශියක් කඩා ඉවත් කර තිබෙනවා. මේ කඩා බිඳ දැමීම් රුවන්වැල්ල බලකොටුවට බලපෑමක් වේදෝ යන හේතුව නිසා ඒ පැත්ත කැඩීම අත්හිටවා තිබෙනවා. මේ තියෙන්නේ ඊට අදාළ ප්‍රවෘත්ති වාර්තාවක්.

තමන්ගේ කඩ කැඩීම නිසා දුකට පත්,  මා හඳුනන කඩ මුදලාලිලාගේ අෙඳා්නා වලටත් ඇහුම්කන් දෙමින්, මහජන පොළ ළඟට පැමිණිවිට, මගේ පැරණි හිතවතකු හමුවුනා. ඔහු සමග පිළිසඳරේ යෙදෙමින්, ගඟ දෙසට ඇවිදිමින් සිටියදී තමයි, මේ එල්ලෙන පාළම නෙත ගැටුනේ. අපි කුඩා කාලයේදී නම් මෙවැනි පාළම් වලට කිව්වේ, ‘සංගිලි පාළම’ කියලයි. මා උපන්, කෑගල්ල දිස්ත්‍රික්කයේ, උඳුගොඩ, මොරදන, ගම ආශ්‍රිතව මෙවැනි පාළමක් තිබුනා මතකයි. මට එක වරම මතක් වුනේ ඔබ සැමදෙනා. ඒ නිසා මම හිතුවා ඔබටත් එය පෙන්වන්න.

  මේ පාලම අඩි 550 ක් දිග බව එහි සමරු ඵලකයේ සඳහන් වෙනවා. අද මෙය ලංකාවේ දිගම එල්ලෙන පාලම (Suspension Bridge) ලෙස සැළකෙන බවයි මගේ මිතුරා මට කිව්වේ. මේ පාළම 2007 වර්ෂයේදී සබරගමුව පළාත්සභාව විසින් ඉදිකරන ලද්දක්. මා සොයා බැලුවා ලංකාවේ එල්ලෙන පාළම් ගැන වෙනමම තොරතුරු ඇද්ද කියා. නමුත් එය සාර්ථක වුනේ නැහැ.

  පාළමෙන් එගොඩවෙන ප්‍රදේශය හඳුන්වන්නේත් ‘පාලංගමුව’ කියලයි. ඊට එහා තියෙන්නේ නිකවලමුල්ල, කුරුපැත්ත වැනි ගම්මාන.  ගම්පොල කඳුවැටි ආශ්‍රිතව උපත ලබන ගුරුගොඩ ඔයත් ශ්‍රීපාද කඳු පන්තිය ආශ්‍රිතව උපත ලබන කැළණි ගඟත් රුවන්වැල්ලේදී එක්වෙනවා. (මට මතක්වෙනවා ඉන්දියාවේ අලහබාද් නගරය. එහිදී මා දුටුවා ගංගා සහ යමුනා නදී දෙක එක්වන ස්ථානය. හින්දු විශ්වාසයේ හැටියට පියවි ඇසට නොපෙනෙන සරස්වතී නදියත් එතැනදී අනෙක් ගංගා දෙකට එකතු වෙනවාලු)    මෙතනින් එහාට කතා නෑ පින්තුර විතරයි.

රුවන්වැල්ල බලකොටුවේ පින්තුරය Google Images වෙතින් උපුටාගන්නා ලදී.

2013 මැයි මස 16 වැනි දින 0018 පැය

තම්පලා ගහේ කතාව – The Fable of Amaranthus Plant

  තම්පලා ගහේ කතාව අහලා තියනවද? අහලා නෑ? වෙන්න බෑ. බොහොම දෙනෙක් දන්නා කතාවක්නේ ඒක. ළදරු පාසලට ගියකාලේ අහලා නැද්ද ඒ කතාව? ඊළඟට කියයිද දන්නේ නෑ තම්පලා කියන්නේ මොනවද කියලා. එහෙම නැත්නම් කියයිද දන්නේ නෑ අපි ළදරු පාසලට ගියේ නෑ කෙලින්ම ‘වැඩිහිටි පාසල’ට තමයි ගියේ කියලා.  හැබැයි ලස්සන වැඩක් තියනවා. ඔබ දන්නා කවුරුහරි ඉන්නවද ‘අමරනාත්’ කියලා කෙනෙක්? මොකද හින්දි භාෂාවෙන් තම්පලා වලට කියන්නේ අමරනාත්. ජූලි හතයි නේද? විස්වාස නැත්නම් මෙන්න මෙතනට ගිහින්බලලා එන්ඩකෝ සියැසින්ම. දැන් අමරනාත් කියලා නම තියන අයට ‘හලෝ මචං තම්පලා’ කියලා කතා කරන්න පුළුවන්. හැබැයි ඉතිං ඕවා කියන්න ගිහින් තමුන්නාන්සේගේ දන්ත ධාතූන් වහන්සේලා ආමාශය කරා වැඩම කරාට මම වගකියන්නේ නැහැ ඔන්න.

  මේ ඔක්කොම දේවල් කිව්වේ මේ දිනවල අපේ ගෙවත්තේ ඉතා සරුවට වැවී තියන තම්පලා ගස් දෙකක් දැකීමෙන් මගේ අතීත මතකය ඇවිස්සීම නිසයි. මෙන්න ගස්දෙකේ පින්තුර.

  මේ පින්තුරයේ තිබෙන ගහ හරියටම අඩි 10 ක් උසයි. අද උදේ තමයි මැනලා බලලා පින්තුරත්  ගත්තේ.

  මේ ගහ තියෙන්නේ අපේ ගෙදරත් අල්ලපු ගෙදරත් වෙන්වෙන තාප්පය අයිනේ. ඒ නිසා පින්තුර ගැනීම ටිකක් අපහසුයි. පින්තුරයේ පසුබිමේ තියෙන්නෙත් අල්ලපු ගෙදර. ඔන්න ඊළඟට පෙන්වන්නම් අඩි 7 ක් උස අනික් තම්පලා ගහ. මේ ගස් දෙකේම වයස මාස 3 යි.

  මම හිතන්නේ මේ තම්පලා ගහේ කතාව කතාව මම ඇහුවේ 1959 – 60 විතර කාලයේදී කියලයි. ඒ කාලේ මගේ පන්තිභාර ගුරුවරිය මගේ අම්මා. අම්මාගෙන් ඉගෙනගත් එවැනි කතා බොහොමයක් මතකයේ තවමත් තිබෙන අතර ‘අම්මා බුදුවේවා’ කියා ප්‍රාර්ථනා කරන්නට මෙය අවස්ථාවක් කරගන්නවා.

  දැන් ඉතිං කතාවට බහිමු. හැබැයි දන්නවනේ……. කතන්දරයක් කියනකොට හූමිටි තියන්න ඕනෙ හොඳෙයි……

  ඔන්න එකෝමත් එක රටක ගමරාල කෙනෙකුයි ගම මහගේ කෙනෙකුයි හිටියා. මේ දෙන්නට ලස්සන දුවෙකුත් හිටියා. ගමරාලයි ගම මහගෙයි කල්පනා කරා ‘දැන්නම් දුවව දීග දෙන්න හොඳ කාලේ තමයි’ කියලා. ඔහොම හිතලා ඒ දෙන්නා කල්පනා කළා, අපේ කෙල්ලව දෙන්න ඕනෙ පිළිවෙලකට වැඩක් කරන්න දන්නා, කල්පනා කරලා, සැළසුමක් ඇතුව වැඩ කරන්න දන්නා, තරුණයෙකුට තමයි කියල. මේ කාලේදී ගමරාලගේ හේනේ යෝධ තම්පලා ගහක් හැදිලා තිබුණා. ඉතිං ගමරාල විශාල ප්‍රචාරයක් ගෙනගියා, මේ තම්පලා ගහ කපපු කෙනාට තමන්ගේ දුව බන්දලා දෙනබව කියලා.

   (ප්‍රචාරක අනුග්‍රහය තම්පලා ඇට ගෙන්වන්නෝ සහ බෙදා හරින්නෝ ‘ඇට සහ පුත්‍රයෝ’කියලා කියන්න මොකෙක්වත් හිටියේ නෑ ඒ කාලේ ගමරාලගේ වාසනාවට. නැත්නම් ප්‍රචාරය වෙන්නේ උන්ගේ සමාගමේ නම මිසක් ගමරාලගේ පණිවිඩේ නෙවෙයිනේ  ) 

  ප්‍රචාරය ගියා විතරයි ඒ පළාතේ ඉන්න තරුණයෝ පෝලිමේ එන්න ගත්තා. මොකද ගම දුව එච්චරටම ලස්සනයි.

  (ගම දුව පාවිච්චි කරන්නේ අහවල් සබන්, ඔබත් අදම ‘ගම දුව සබන්’ පාවිච්චිකර වෙනස වටහාගන්න   )

  තම්පලා ගහක් කපන එක මහා ලොකු වැඩක් නෙවෙයිනේ. ඉතිං අර පෝලිමේ ආව තරුණයන්ව ගමරාල සහ ගම මහගේ නමැති ද්විපුද්ගල සම්මුඛ පරීක්ෂණ මණ්ඩලය විසින් සම්මුඛ පරීක්ෂණයට භාජනය කරනවා හේනේදී ම. නම ගම විස්තර අහලා ගමරාල අහනවා ‘ඔය ළමයට අර පෙනෙන තම්පලා ගහ කපන්ඩ පුලුවන්ද’ කියලා. ‘හයියෝ මාමේ ඕකත් වැඩක්ද? කෝ දෙන්ඩ පිහිය, එක පාරෙන් කපන්නම්’ කියන තරුණයන් සම්මුඛ පරීක්ෂණයෙන් අසමත් වෙනවා. ඒ වගේම පිහිය අතට ගත්ත ගමන්, ගහ කපන්ඩ යන්න හදන අයට ගමරාල කියනවා, ‘හරි හරි ළමයෝ, ගහ කපන්ඩ ඕනෙ නෑ, ඔය ළමයා අසමත්’ කියලා. මේ විදිහට දවස් ගණනාවක් පවත්වපු සම්මුඛ පරීක්ෂණයෙන් සමත්වෙන්න කාටවත් බැරිවුනා. ඔන්න එක දවසක් බොහොම කඩවසම්, ශක්තිමත් පෙනුමක් මෙන්ම බොහොම ශාන්තදාන්ත පෙනුමකින් යුත් තරුණයෙක් සම්මුඛ පරීක්ෂණයට ආවා.

  (ගම දුව ජනේලෙට මුවා වෙලා මේ තරුණයා දිහා බලා ඉන්න ගමන් හිතුවා, මෙයා බුකියේ ඉන්නවද දන්නේ නැහැ. ඉන්නවානම් චැට් කරන්නත් තිබුනා කියලා. හුටා……… ඒ කාලේ එව්වා තිබුනේ නෑ නේද? නොදෝකිං ………ෆේස් බුක් කියන වචනය බුකිය කරගෙන ඇයි යකෝ ‘බුකිය’ කියන්නේ මොකක්ද? )

  ඔන්න ඉතිං අර තරුණයා සම්මුඛ පරීක්ෂණ මණ්ඩලය ඉදිරියට ඇවිල්ලා, සිංහල ක්‍රමයට ආචාර කරලා එකත්පස්ව හිටගත්තා කියමුකෝ. ‘එකත්පස්ව හිටගන්නවා’ කියන එක විස්තර කරන්න ඕනෙ නැහැනේ? ඉතිං සුපුරුදු පරිදි සම්මුඛ පරීක්ෂණ මණ්ඩලය කිව්වා ‘ළමයෝ, අන්න අර තම්පලා ගහ කපන්න තමයි තියෙන්නේ සම්මුඛ පරීක්ෂණයෙන් සමත්වීම සඳහා’ කියලා.  තරුණයා කිව්වා මාමණ්ඩි මම ගහ බලලා එන්නම් කියලා. එහෙම කියලා ඔහු තම්පලා ගස සහ ඒ අවට හේන් බිම හොඳින් පරීක්ෂා කළා. ඊළඟට ඔහු ඇහුවා ‘තම්පලා ගස කැපීමට තියන ආයුධය මොකක්ද’ කියලා. ගමරාල ඔහුගේ අතට පිහිය දුන්නා. ඔහු තමන් අඳ සිටි පලු බැනියම ගලවලා, පිහිය මුවත් තියන්න පටන් ගත්ත. පිහිය හොඳින් මුවහත් වුනාම ඔහු සරම කැහැපොට ගහගෙන සූදානම් වුනා තම්පලා ගහ කපන්න. ගමරාල කිව්වා ‘තම්පලා ගහ කපන්න ඕනෙ නෑ පුතේ, උඹ තමයි අපි හොයපු එක්කෙනා’ කියලා.

  ඉතිං මේ කතාවේ ආදර්ශය කුමක්ද? නොවැදගත් සහ බොහොම සුළු වැඩක් යයි අපි සිතන වැඩ පවා, එක්තරා පිළිවෙලකට නොකලොත්, එයින් නොසිතු ප්‍රතිඵල ඇතිවෙන්න පුළුවන්. ඇයි අර තරුණයා මුලින්ම තම්පලා ගහ පරීක්ෂා කලේ? පළමුව බලන්න ඕනෙ, එතනට යන්න පුළුවන්ද කියලා. හේන්වල සතා සරුපයා ඉන්නවා. ඒ ගැන සැලකිලිමත් වෙන්න ඕනෙ. හේනක හැම තැනම විවිධ බෝග වගා කරලා තියනවා. තම්පලා ගහ කපද්දී ඒ බෝගයක් උඩට වැටුනොත් හානි වෙනවා. පිහිය මුවහත් නැත්නම් මෙතරම් දුර්වල කඳක් තියන තම්පලා ගහ කපන්නත්, නිකරුනේ මහන්සිය සහ කාලය වැයවෙනවා.

  මේ කතාව අදට වුනත් වලංගුයි කියලා පෙනෙනවා නේද?

2013 මැයි මස 11 වැනි දින 0921 පැය 

අපි දෙන්නේ ඔක්කොම සුන්නද්දූලි වෙලා යන්ඩ …හරිද…? (තුන්වැනි කොටස) – WMD and NBC Warfare (Part Three)

  අපි දෙන්නේ ඔක්කොම සුන්නද්දූලි වෙලා යන්ඩ ලිපි මාලාවේ තුන්වැනි කොටසෙනුයි අද මා ඔබව හමුවන්නේ. මේ ලිපි මාලාවේ පළමුවැනි කොටසෙන් සහ දෙවැනි කොටසෙන්, ඔබ සමූලඝාතක අවි ගැන යම් සරල දැනුමක් ලබන්නට ඇතැයි මා විශ්වාස කරනවා. ඒ දැනුම තවත් ඉදිරියට ගෙනයමින්, අද මා ඔබ සමග සාකච්ඡා කරන්නේ ජීවවිද්‍යාත්මක සමූලඝාතක අවි සහ රසායනික සමූල ඝාතක අවි පිළිබඳවයි. මේ විස්තර කියවද්දී ඔබට පැහැදිලි වෙනවා ඇති, වර්තමාන ලෝකය, සමූල ඝාතක අවි වලින් සන්නද්ධව සිටින ආකාරය අනුව, එම අවි පාවිච්චි කරමින් යුද්ධයක් ඇතිවුනොත්, ඒ යුද්ධයට කිසිසේත් සම්බන්ධ නැති රටවලට පවා, ඉතා දැඩි හානි සිදුවියහැකි බව.

  කෙසේ වෙතත්, වර්තමානයේදී, මේ අවි සහිත රටවල් එකිනෙකාට ඇති බිය නිසා හෝ ඉවසීම නිසා හෝ තවමත් මේ අවි පාවිච්චියට ගෙන යුද්ධ කරන්නේ නැහැ. එහෙත්, සැමදාම එසේ වේයැයි ස්ථිරව නිගමනය කළ නොහැකියි. මිනිසා තම මිනිස්කමෙන් ඉවත්වූදාට ලෝකය තවදුරටත් නොපවතිනු ඇති.

ජීවවිද්‍යාත්මක සමූලඝාතක අවි

මුලින්ම අපි නිර්වචනය කරගනිමු ජීවවිද්‍යාත්මක සමූලඝාතක අවි කියන්නේ මොනවාද කියා.

  “සංග්‍රාමෝපාය ලෙස, විවිධ හදිසි රෝගාබාධ තත්වයන් ඇතිකිරීමෙන් හෝ ක්ෂුද්‍රජීවී බලපෑම් සහ/හෝ, ස්නායු පද්ධතියේ ක්‍රියාකාරිත්වය විකෘතිකරණයෙන්, මිනිසා ප්‍රමුඛ ජීවීන්ගේ පැවැත්ම කෙරෙහි මහා පරිමාණයෙන් එල්ල කෙරෙන බලපෑම් හේතුකොටගෙන, මරණය හෝ තදබල අසාධ්‍ය තත්වයක් ඇති කරන්නාවූ, උපක්‍රමිකව යොදවන ජීවවිද්‍යාත්මක ක්‍රියාවලීන්, ජීව විද්‍යාත්මක අවි වශයෙන් හැඳින්වේ”.

  ටිකක් බරපතලයි නේද නිර්වචනය? දෙතුන් වරක් කියවලා බලන්න. එතකොට පැහැදිලි වෙනවා. එහෙම නැත්නම් මෙහෙම හිතන්න.

   යුද්ධයකට පැටලුන රටක ඉන්න මිනිස්සුන්ව ලෙඩ කරවලා, හදිසි අසනීප තත්වයන්ට ලක් කරලා, මිනිසුන්ව මරා දමන හෝ තදබල අසාධ්‍ය තත්වයට පත්කරන, විෂබීජ පතුරවන උපකරණ හෝ උපක්‍රම තමයි, ජීවවිද්‍යාත්මක අවි කියන්නේ.

දැන් හරි නේද? තව ඉදිරියට කතාකරගෙන යමුකෝ, තවත් පැහැදිලි වෙන්ඩ.

  යුද කටයුතු වලදී මේ ජීවවිද්‍යාත්මක අවි සහිත සටන් හඳුන්වන්නේ Biological Warfare (කෙටි යෙදුම BW) යනුවෙන්. මොනවද ඉතිං ජීවවිද්‍යාත්මක අවි වලට දාන පතරොම්? පතරොම් තමයි, මිනිස් ජීවිතයට අතිශයින් හානිකර භයානක බැක්ටීරියා වර්ග, වෛරස් වර්ග, පුස් වර්ග, සහ තවත් එවැනි ජෛවමය ක්‍රියාකාරීත්වයෙන් යුත් ද්‍රව්‍ය. මේවා මගින් සොල්දාදුවන් සහ සාමාන්‍ය ජනතාව මරාදැමීම/අඩපන කිරීම/රෝගාබාධ නිසා යුද පිටියෙන් ඉවත්වීමට සැළැස්වීම/ තමයි මේ අවි යෙදවීමේ පරමාර්ථය. ඒ තත්වය යුද්ධය පවතින රටක මහජනතාවටත් එලෙසම බලපානවා. එතකොට මොකද වෙන්නේ. යුද්ධ කරන්න කවුරුවත් නැති නිසා යුද්ධය පරදිනවා. ජීවවිද්‍යාත්මක අවි වලට සෑහෙන ඉතිහාසයක් තියනවා. ක්‍රිස්තු පූර්ව 600 තරම් ඈත අතීතයේදී පවා බෝවන රෝග විෂබීජ සතුරු ප්‍රදේශවල පැතිරවීම සිදුවී තිබෙනවා. පසුගිය වසර 2000 තුළ විවිධ රටවල සිදුවූ ජීවවිද්‍යාත්මක ප්‍රහාර පිලිබඳ සංක්ෂිප්තයක්මෙතනින් බලන්න පුලුවන්. දෙවැනි ලෝක යුද සමයේදීත් ජීවවිද්‍යාත්මක ප්‍රහාර සැලසුම් සහ පර්යේෂණ ලෝකය පුරාම පාහේ සිදුවී තිබෙනවා.

ජීවවිද්‍යාත්මක අවි මේ තරම් භයානක ඇයි?

  පළමුවැනි හේතුව ඒවා ඇහැට පෙනෙන්නේ නැහැ, ගඳ/සුවඳක් නැහැ. පෙනෙනවා නම් හෝ ගඳ සුවඳක් දැනෙනවානම්, දුවලා හරි බේරෙන්න පුළුවන්නේ. දෙවනුව ඒවා සාමාන්‍ය බෝම්බයක් හෝ වෙඩි උණ්ඩයක් මෙන් මේ දැන් ක්‍රියාත්මක වෙන්නේ නැහැ. සිරුරට ඇතුළුවී පැය/දින ගණනාවකට පස්සෙයි රෝග ලක්ෂණ මතුවෙන්නේ. එතකොට ‘පෙරහැර ගිහිල්ලා ඉවරයි’. බේරාගන්නට බැහැ. මෙහෙම හිතන්න, අපිත් එක්ක වෙළඳ ගනුදෙනු කරන රටක් තියනවා. අපි ඒ රටට කියනවා, ‘ඔයාලගේ රටට වඩා, අහවල් රටේ බඩු (බඩු කිව්වේ බඩු) හොඳයි. මීට පස්සේ අපි එහෙන් බඩු ගන්නවා, ඔයාලගේ ඒවා එපා’ කියලා. ඊළඟට ඒ රට මොකද කරන්නේ? ඒ රට බොහොම බලගතු රටක්නම්, ‘එහෙමද පුතෝ, හරි එහෙනම් බලාගම්මු’ කියලා, එයාලගේ ගුවන් යානයකින්, අපේ රටට ඉහල අහසේ, අපි මීට කලින් කවදාවත් ගොදුරු වෙලා නැති, මහා භයානක, මාරක, වසංගත රෝග බෝ කරන විෂබීජ, පතුරවලා දාන්න පුළුවන්. ගුවන් යානය, වෙන වැඩකට අපේ රටට එන විදිහට ඇවිත්, අර බලු වැඩෙත් කරලා යනඑක, නිකම් කජු කනවා වගේ වැඩක්. (කවුද දන්නේ දැනුත් එහෙම වෙනවද කියලා. ඔය වරින්වර අපේ රටේ මතුවන්නේ මීට කලින් අහලා නැති එක එක විදිහේ උණ රෝග) ජීවවිද්‍යාත්මක අවි එතරම් භයානකයි.

  ගාලු මුවදොර පිටියේ පැවැත්වෙනවා මහා සංගීත සංදර්ශනයක්. (ඔව් ඔව්, ‘බාල්දිය තංගුස්’, අර ඇමේසන් යෝදිය වගේ එක්කෙනා, ඔක්කොම එනවා. අපි ඔව්වට යන්නේ නැති නිසා බේරෙනවා  )  මේ සංදර්ශනය බලන්න රටේ හැම පළාතකින්ම වගේ සෙනග එනවා. අපේ හතුරෙක්, වාතය ඔස්සේ පැතිරෙන මාරක වෛරසයක් අඩංගු (කෑම පෙට්ටියක් වැනි) භාජනයක් ගෙනත්, අර සෙනග මැදට දාලා යනවා. කවුරුහරි මේක ඇරලා බැලුවම මොකුත් නෑ. අල්ලලා විසිකරනවා. නමුත් අර වෛරසය, ප්‍රසංගය බලන්න ආව අයගේ සිරුරට ඇතුළුවෙලා, මුළු රටපුරා යනවා.  සමහරවිට මෙතෙක් අපේ රටේ නොතිබුන මාරක වසංගතයකින්, දහස් ගණනක් මියයනවා. රටේ ආර්ථිකය කඩාවැටීමට පවා එවැනිදේ බලපානවා.

  මගේ පරම හතුරෙක් ඒ සංදර්ශනය බලන්න එනබව මම දැනගන්නවා. මම යොදවනවා කාන්තාවක්. ඇගේ අතේ තියනවා මුද්දක්. ඒ මුද්දේ තියනවා සියුම් තුඩක්. ඒ තුඩ සර්පයකුගේ විෂ දළයක් වගේ. ඒ තුළ තියෙන්නේ, මාරාන්තික, ජීවවිද්‍යාත්මක විෂබීජ. මේ කාන්තාව අර මගේ සතුරා ලඟින් යන ගමන්, වැටෙන්න ගියා වගේ ඔහුගේ ඇඟේ හැපෙන ගමන්, අර තුඩෙන් සීරීමක් කරනවා. කාන්තාවක් එහෙම වැටෙන්න යනකොට පැනලානේ අපි (මමත් ඇතුළුව) අල්ලන්නේ. මගේ සතුරා දිනකින්/දෙකකින්/තුනකින් ඉවරයි. 

  ජීවවිද්‍යාත්මක ද්‍රව්‍ය පාවිච්චි කළ  අවස්ථා පිලිබඳ සංක්ෂිප්තයක් මෙතනින් බලන්න.

  ජීවවිද්‍යාත්මක අවි ප්‍රහාරයන්ට ලක්වුනොත් ඇතිවන ප්‍රතිඵල පෙන්වන පින්තූර කීපයක් පළ කරනවා පහළින්. මා ඉතාම කණගාටු වෙනවා මේ පින්තූර නිසා ඔබතුළ යම් කම්පනයක් ඇතිවනවා නම්.

මා හිතනවා, දැන් ඔබට ජීවවිද්‍යාත්මක අවි ගැන යම් අවබෝධයක් ලැබෙන්නට ඇති කියා. ඒ නිසා අපි මීළඟට සළකා බලමු රසායනික අවි ගැන.

රසායනික සමූලඝාතක අවි

  මෙහිදීත් අපි මුලින්ම රසායනික අවියක් කියන්නේ මොකක්ද කියලා නිර්වචනය කරගැනීම හොඳයි නේද? 

  “මිනිස් සිරුරට සහ අනෙකුත් සත්වයන්ට හානිකර සහ මාරාන්තික හානි පමුණුවන රසායනික මූලද්‍රව්‍යයක්, හෝ සම්මිශ්‍රණයක්, බෝම්බයක් ලෙස හෝ උණ්ඩයක් ලෙස හෝ වෙනත් ප්‍රක්ෂිප්ත උපකරණයක් ලෙස පාවිච්චි කළහැකි උපක්‍රමයකින් ප්‍රචාලනය කිරීමේ උපකරණය රසායනික අවියක් ලෙස සැළකේ”

   අර ජීවවිද්‍යාත්මක අවි නිර්වචනය තරම් අමාරු නැහැ නේද? හරි හරි, කෝකටත් මම ගැටපද විවරණයක් කරන්නම්කො.  මෙන්න මෙහෙමයි.

  අපේ ඇඟේ ගෑවීමෙන්, ආඝ්‍රාණය වීමෙන්, වැනි ක්‍රමවලින් අපේ ශරීරයට හානි පමුණුවන රසායනික ද්‍රව්‍ය තියනවනේ, ඇසිඩ් වගේ දේවල් ගෑවුනොත් පිච්චෙනවා. සමහර වායුවර්ග ආඝ්‍රාණය වුනොත් මැරෙන්න/සිහිනැතිවෙන්න ඉඩ තියනවා. එවැනි වායුව සහිත බෝම්බයක් පිරිසක් මැදට පතිත කෙරුවොත්, මහා විනාශයක් සිදුවෙනවා. සයනයිඩ් වගේ දෙයක් නොදැනුවත්ව කැවුනොත් මැරෙනවා. සයනයිඩ් වගේ දෙයක් වෙඩි උණ්ඩයක තවරලා වෙඩි තිබ්බොත් මැරෙන්නේ උණ්ඩයෙන් නොවෙන්න පුළුවන්. උණ්ඩය අපේ සිරුරේ ගෑවී හූරාගෙන ගියාම ඇති. එතනින් සයනයිඩ් විස ශරීර ගතවෙලා මැරෙනවා. අන්න ඒවගේ ප්‍රහාර තමයි රසායනික අවි ප්‍රහාර වෙන්නේ.

  ඉහත ජීව විද්‍යාත්මක අවි ප්‍රහාරයක් යෙදවීමට අර කාන්තාව ප්‍රයෝජනයට ගත්තා වගේ උදාහරණයක් කියන්නම්.

   මගේ ළඟ තියනවා පිරිමි අය පාවිච්චි කරන අර ලොකු කුඩයක්. ඒකෙ අග තියනවනේ අර කූරක්. (කුඩේ ඉහළගත්තම අහසට යොමුවෙන්නේ) මම, මගේ හතුරා අසලින් යනගමන්, ඒ කූරෙන් ඔහුව සූරාගෙන යනවා, අත්වැරදීමක් වූ ලෙසට. ඒ කූරෙන් රසායනික ද්‍රව්‍යයක් නිකුත් කරන්න පුළුවන්. ඒ සඳහා අදාළ ස්විච් එක තියෙන්නේ කුඩ මිටේ. කොහොමද වැඩේ?   

ලෝකයේ අතීතයේදී පාවිච්චිකළ නමුත්, එක්සත් ජාතීනේගේ ප්‍රඥප්ති අනුව අද පාවිච්චි කරන්න තහනම්, උණ්ඩ වර්ගයක් තියනවා, ‘ඩම් ඩම් බුලට් - Dum Dum Bullet’ කියලා. 

(1870 දී පමණ, එවකට ඉන්දියාව පාලනය කළ, බ්‍රිතාන්‍ය ජාතිකයන් විසින්, ඉන්දියාවේ කල්කටා නගරය ආසන්න, ‘ඩම් ඩම්’ කියන ප්‍රදේශයේදී තමයි, මේවා මුලින්ම නිපදවා තිබෙන්නේ. ඒ නිසයි ඒ නම ලැබී තියෙන්නේ)

ඒවා ක්‍රම කීපයකට හදනවා. තහනම් වර්ගය හදන්නේ මෙහෙමයි. සාමාන්‍ය රයිෆල් පතරොමක් අරගෙන එහි තුඩ හෙවත් තුවක්කුවෙන් පිටවී යන උණ්ඩය කොටස යකඩ කපන කියතකින් කුරුස හැඩේට කපනවා. සියුම් පැළීමක් විතරයි. ඒ තුලට සයනයිඩ් වැනි දෙයක් දාලා වෙඩි තියනවා. සීරිලා ගියත් ඇති. මරණය ස්ථිරයි. ඊට අමතරව පතරොමේ තුඩ ඇතුළට කුහරයක් වගේ හදන ක්‍රම සහ ඉලක්කයට වැදුනම තුඩ විසිරී හානිය වැඩි කරන ක්‍රමත් තියනවා. ඒවා තහනම් නැහැ.

සමූල ඝාතක අවි ලෙස සැළකෙන රසායනික අවි මීට වඩා බරපතළයි. මම දෙන්නම් ලැයිස්තුවක්. ඒක කියවලා බැලුවම තේරෙයි, රසායනික අවි වලට යෙදිය හැකි රසායන වර්ග, කොච්චර තියනවද කියලා.

මෙන්න ලැයිස්තුව.

• කඳුළු ගෑස් වර්ග –  Tear agents
• වමනය ඇතිකරන රසායන – Vomiting agents
• දුර්ගන්ධය ඇති කරන රසායන – Malodorants
• අඩපණ කරවන රසායන – Incapacitating agent
• මානසික තත්වය වෙනස් කරවන රසායන – Psychological agents
• සම මතුපිට බිබිලි හෝ දියපට්ට ඇති කරන රසායන වර්ග – Blister agents & Vesicants
• සිරුරේ රුධිර සංසරණය අවුල් කරන රසායන – Blood agents
• සම මතුපිට දැවෙන සුළු තත්වයක් ඇති කරන රසායන – Urticants
• හුස්ම හිරකරවන රසායන –  Choking agents
• ස්නායු පද්ධතිය අක්‍රිය කරවන රසායන – Nerve agents

  මේ සෑම වර්ගයකටම අයත් උප වර්ග කිරීම් රාශියක් තියනවා. ඒවා ඉතා දීර්ඝ විස්තර නිසා මෙහි ඇතුලත් කරන්නේ නැහැ. රසායනික අවි ප්‍රහාර වලට ලක්වූ අයගේ පින්තූර කීපයක් පහත දක්වනවා. නැවතත් අවධාරණය කරනවා මේවා දැකීමෙන් ඔබට ඇතිවන කම්පනය ගැන මා කණගාටු වෙන බව.

මේ දිනවල සිරියානු ජනාධිපතිවරයාටත් චෝදනා එල්ලවී තිබෙනවා, ඔහුගේ ආණ්ඩුවට විරුද්ධව සටන් කරන කැරළි කරුවන්ට එරෙහිව රසායනික අවි එල්ල කරනවා කියා. එය සත්‍යයක් බව ඔප්පුවී තිබෙනවා. ඒ වගේමයි ඉරානය දෙසටත් දැන් දැන් ඇමරිකාව ප්‍රමුඛ රටවල් කීපයක් එක්ව එක්සත් ජාතීන්ගේ අවධානය යොමුකරවා තිබනවා. න්‍යෂ්ටික අවි නිපදවීමට ඉඩ ඇතිබව ප්‍රකාශ කරමින්. ඉරානය තවත් ඉරාකයක් වෙයිද දන්නේ නැහැ. උතුරු කොරියාව පාරම්බෑවාට දෙඤ්ඤං බැටේ කියලා, තවම ‘සීන් එකට ඇන්ටර්’ වුනේ නැහැ. අපි වගේ සොක්කන්ට තියෙන්නේ පඬුරක් ගැටගහන්ඩ විතරයි. මෙහාටනම් ඔව්වා එන්ඩ එපා කියලා. 

න්‍යෂ්ටික අවි වලින් බේරෙන්න බැරි වුනත්, ජීවවිද්‍යාත්මක සහ රසායනික අවි වලින් සිදුවන හානිය අවම කරගතහැකි ඇඳුම් සහ ස්වසන උපකරණ සකස්කර තිබෙනවා. නමුත් ඒවා ඇඳගෙන සටන් කිරීමනම් සොල්දාදුවකුට එතරම් පහසු නැහැ.

  සංග්‍රාමයකදී, තුවක්කු බෝම්බ ආදිය පාවිච්චි කරමින් ගහගැනීම වෙනම දෙයක්. නමුත්. ජීවවිද්‍යාත්මක අවි, රසායනික අවි, පාවිච්චි කිරීම නොමිනිස් ක්‍රියාවක් ලෙසයි සැළකෙන්නේ. ඒ නිසා අද ලෝකයේ කිසිම රටකට අයිතියක් නැහැ ජීවවිද්‍යාත්මක හෝ රසායනිය හෝ අවි නිපදවීමට, ළඟ තබාගැනීමට හෝ පාවිච්චි කිරීමට තහනම් කරමින් විවිධ ප්‍රඥප්ති පනවා තිබෙනවා එක්සත් ජාතීන්ගේ සංවිධානය විසින්.

එක්සත් ජාතීන්ගේ සංවිධානය මොනවද කරලා තියෙන්නේ?

  සමූල ඝාතක අවි ලෝකයෙන් තුරන් කිරීම සඳහා ක්‍රියාකරන්නේ එක්සත් ජාතීන්ගේ අවිහරණ කටයුතු පිලිබඳ කාර්යාලයයි. United Nations Office for Disarmament Affairs = UNODA. මේ මගින් අතීතයේ සිට විවිධ ප්‍රඥප්ති රාශියක් පනවා තිබෙනවා සමූල ඝාතක අවි පිළිබඳව. නමුත් අවාසනාවකට මෙන් ඒ ප්‍රඥප්ති වලට එකඟවූ සමහර රටවල් රහසිගතව සමූලඝාතක අවි නිපදවීම, ගබඩා කිරීම, පර්යේෂණ පැවැත්වීම සිදුකරනවා. එමෙන්ම සමූල ඝාතක අවි තියන ලෝකයේ සමහර රටවල් මේ ප්‍රඥප්ති වලට අත්සන් තබා නැහැ. 

සමූල ඝාතක අවි ලෝකයෙන් තුරන් කරන්නට අපට කළහැකි යමක් නැද්ද?

  මුලින්ම මේ සමූලඝාතක අවි තියන රටවලට වගකීමක් තියනවා අනෙකුත් අහිංසක රටවල් මේ අනතුරෙන් මුදාගන්නට. දෙවනුව ඔවුන් අවබෝධ කරගතයුතුයි, මහා පරිමාණ න්‍යෂ්ටික යුද්ධයක් ඇතිවුනොත්, ලෝකය කියා දෙයක් ඉතුරුවෙන එකක් නැතිබව. අප වැනි කුඩා රටවලට පුළුවන්, සමූල ඝාතක අවි සහිත මහා ජාතීන්ට කරුණු කියාදෙන්න. එමෙන්ම ඒ රටවල් ප්‍රතික්ෂේප කර, අමාරුවෙන් හෝ අපේ ආර්ථිකය පවත්වාගනිමින්, වැඩියෙන් වැඩකොට යම් සහනදායක තත්වයක ඉන්න. මේ සඳහා, සමූල ඝාතක අවි නොදරන රටවල එකමුතුවක් සාදාගනීමත් හරිම වැදගත්. සමූල ඝාතක අවි ප්‍රතික්ෂේප කරන රටවල තියන, සමූල ඝාතක අවි නිපදවීම සඳහා ගතහැකි මූලද්‍රව්‍ය, එවැනි කටයුතු කරන රටවලට නොවිකුණා සිටීමත් වැදගත්. අපේ බාල පරපුර මේ පිළිබඳව ඉතා පුළුල් ලෙස දැනුවත් කිරීමත්, අතිශයින්ම වැදගත්. කවදා හෝ ඔවුන්වත් මේ දුෂ්ඨ ලෝකය පිවිතුරු ලෝකයක් කරයි එවිට.

මූළාශ්‍ර:-

• http://en.wikipedia.org/wiki/Weapon_of_mass_destruction
• http://en.wikipedia.org/wiki/Nuclear_weapon
• http://en.wikipedia.org/wiki/Biological_warfare
• http://en.wikipedia.org/wiki/Chemical_warfare
• http://www.un.org/disarmament/

සියලුම පින්තූර Google Images සහ මූළාශ්‍ර වලට අදාළ වෙබ් අඩවි වෙතින් ලබාගන්නා ලදී.

2013 මැයි මස 03 වැනි දින 2238 පැය

එදා මෙදා තුර

e

එදා මෙදාතුර ඡන්දෙට විවරවු
දේශපාලු කුණු කටක් නිසා
රටේ ගලාගිය ජාතික සම්පත්
ආපසු ඇදගනු කෙළෙස කියා

මිලානවී ගිය මහජන හදවත්
රටටම මූසල පාට පොවා
අපිව ගහේ බැඳ ගහන්න තරමට
අපේම හිත් දෙයි දුකම කියා

රටේම නිදහන් පලා මැණික් කැට
ගෙනයද්දී හෙලිකොප්ටරයෙන්
කාත් කවුරුවත් නැතත් හිතයි මට
ගහන්න මිසයිල් කරට උඩින්

ඈත් කරන්නට මුන්ගේ හඩු ගඳ
හදවත කකියන ලේ සුවඳින්
මාත් මගේ දරුවොත් ගැන සිහිවී
ඒත් සිටිමි මම කල් මරමින්

ඊයේ උපන් අය අද මිය යන්නට
හිතෙන තරම් ගිනි ගොඩකි ලයේ
හීයේ වේගෙන් අහස උසට යන
මේ ජීවන බර හෙටත් තියේ

ඒත් ඉතිං දැන් බලා හිටිය ඇති
පාරට බහිමුද අපිත් මෙහේ
ආයේ දවසක හරියට ඡන්දය
කරවමු මේ රට තුළ ම ප්‍රියේ

සමාවන්න සනත් නන්දසිරි මහතාණෙනි.

2013 අප්‍රේල් මස 29 දින 0824 පැය

අපි දෙන්නේ ඔක්කොම සුන්නද්දූලි වෙලා යන්ඩ. . . හරිද?. . (දෙවැනි කොටස) – WMD and NBC Warfare (Part Two)

  අපි දෙන්නේ සුන්නද්දූලි වෙලා යන්ඩ ලිපියේ පළමුවැනි කොටසෙන් මා ඔබට සරල හැඳින්වීමක් කළා, සමූල ඝාතක අවි කියන්නේ මොනවාද කියා. මේ ලිපි මාලාව ආරම්භ කරන්නට හේතු වුනේ, උතුරු/දකුණු කොරියා දෙක අතර ඇතිවූ උණුසුම් යුද තත්වයයි. ලිපියේ දෙවැනි කොටස ඔබවෙත ගෙන එන්නට ප්‍රමාද වුනේ මා සෑහෙන දුරට අවිවේකීව සිටි නිසයි. අනෙක් කරුණ මෙවැනි ලිපියකදී ලියන තාක්ෂණික කරුණුවල නිරවද්‍යතාව පිළිබඳව විශේෂයෙන් සැලකිලිමත වියයුතු නිසා, උඩින් පල්ලෙන් ලියන්නට බැහැ.

   මේ ලිපියෙන් මා ඔබව දැනුවත් කරන්නේ එක් එක් සමූල ඝාතක අවි වර්ග ගැනයි. එමෙන්ම වර්තමාන ලෝකයේ සමූල ඝාතක අවි භාවිතය කෙරෙහි ඇති සම්භාවිතාව කෙබඳුද යන්නත් සාකච්ඡා කරන්නට අපට අවස්ථාව තිබෙනවා. කාගෙ කාගේ කිල්ලොටෙත් හුණු තියනවා කියන පැරණි සිංහල කියමන සනාථ කරමින් ලෝකයේ බලවත් රාජ්‍ය බොහොමයක මේ සමූල ඝාතක අවි තිබෙනවා. කිසියම් දිනක මේ අවි පාවිච්චි නොකර සිටීයැයි කිසිවකුටත් සහතිකයක් දිය නොහැකියි. ඒ කියන්නේ අපේ ලෝකය පවතින්නේ සමූල ඝාතක අවි තර්ජන මැද කියන එකයි කියන්නට තිබෙන්නේ. සමූල ඝාතක අවි පාවිච්චි කරන යුද්ධයක් ඇතිවුනොත් අපි වැනි කුඩා රටවලට සිදුවන හානිය අති මහත්. ඒ නිසාම මේ ගැන දැනුවත් වීම ඉතා වැදගත්.

  සමූල ඝාතක අවි පිලිබඳ ඉතිහාසය පිරික්සීමේදී කාගේත් මතකයට නැගෙන්නේ ලෝකයේ පළමුවැනි පරමාණු බෝම්බ ප්‍රහාර දෙක වෙතයි. මිනිස් ශිෂ්ඨාචාරයේ සමූල ඝාතනයන් සිදුවූ ප්‍රථම අවස්තාව එය නොවෙයි. ඉතා ඈත අතීතයේදී ලෝකයේ පවතී ජාතිවාදී, වර්ගවාදී, ආගම්වාදී යුද්ධ වලදීත් සමූල ඝාතන සිදුවුනා. නමුත් පරමාණු බෝම්බ ප්‍රහාරයකින් සිදුවන සමූල ඝාතනය ඊට වඩා දරුණුයි, විශාලයි, අමානුෂිකයි. සමූල ඝාතක අවි වර්ග වලින් ප්‍රථම ස්ථානය ලැබෙන්නෙත් න්‍යෂ්ටික අවි වලටයි. අපි මුලින්ම නිර්වචනය කරගනිමු න්‍යෂ්ටික අවියක් කියන්නේ මොකක්ද කියා. 

  “න්‍යෂ්ටික අවියක් යනු පරමාණු ප්‍රතික්‍රියාවක් ඇතිකිරීමේ ප්‍රතිඵලයක් වශයෙන් ක්ෂණිකව පිපිරීමක් සිදුකිරීමෙන් සමූල ඝාතනයක් කළහැකි බෝම්බයක් වැනි අවියකි”

  මා කල්පනා කළා ගැඹුරු න්‍යායාත්මක කරුණු වලට නොයා ඔබ සමග බොහොම සරලව මේ කරුණු සාකච්ඡා කරන්න. ඒ නිසා පරමාණු දාම ප්‍රතික්‍රියා ගැන න්‍යායාත්මක කරුණු සාකච්ඡා කරන්නේ නැහැ. එය අනවශ්‍ය විදිහට ලිපිය දික්ගැසීමක් වන නිසා. එමෙන්ම පරමාණු බෝම්බ නිපදවන මූලද්‍රවය හා සමස්ථානික පිළිබඳවත් කතා කරන්නේ නැහැ. ඒ නිසා න්‍යෂ්ටික අවි වර්ග ගැන විතරක් කියන්නම්. උප වර්ග වලට නොබෙදා සරලව කියනවානම් න්‍යෂ්ටික අවි වර්ග දෙකක් තිබෙනවා. ඒ තමයි පරමාණු බෝම්බය සහ ජලකර බෝම්බය. මේ වර්ග දෙකෙන් වඩාත් බලවත් වන්නේ ජලකර බෝම්බයයි. ඉතා සරලව කියනවානම් ජලකර බෝම්බයක් පිපිරවීම සඳහා අවශ්‍ය අධික උෂ්ණත්වය ලබාගැනීමට පරමාණු බෝම්බයක් පුපුරවා ලබන උෂ්ණත්වය ලබාගත යුතුයි.

න්‍යෂ්ටික බෝම්බයක් පිපිරීමෙන් සිදුවන මහා විනාශය ක්‍රම කීපයකින් සිදුවෙනවා. අපි පියවරෙන් පියවර බලමු මොකද වෙන්නේ කියලා. න්‍යෂ්ටික බෝම්බයක් පිපිරුණා වහාම ක්ෂණයකින් ඇස අන්ධ කරන අපට හීනෙන්වත් හිතාගන්න බැරි තරම් මහා ආලෝකයක් හරියට විදුලි කෙටුවා වගේ එහෙමත් නැත්නම් කැමරාවක ක්ෂනිකලෝකය වගේ පිටවෙනවා. ඒ සමගම පැතිරෙනවා මහා ගිනි බෝලයක්. ඒ ගිනි බෝලයේ උෂ්ණත්වය තීරණය වෙන්නේ බෝම්බයේ ප්‍රබලත්වය අනුවයි. එදා ජපානයට දැමූ බෝම්බයෙන් ලෝහයෙන් නිපදවුණ සියල්ල ක්ෂණයකින් උණුවී ගොස් තිබුනා. අද ඊට වටා පනස් ගුණයකට සිය ගුණයකට වඩා වැඩි බලයකින් යුත් බෝම්බ තියනවා. ඉතින් ඔබට හිතාගන්න පුළුවන් නේද විනාශයේ තරම. මේ ගිනි බෝලයේ උෂ්ණත්වයේ බලපෑම කිලෝමීටර් පහකටත් වඩා ඈතට වුනත් දැනෙන්න පුළුවන්. අපි නිකම් කඩදාසි වගේ අළු වෙනවා. මේ බලන්න එදා හිරෝෂිමා බෝම්බයේ දී ගිනි බෝලය පැතිරුණ අන්තිම සීමාවේ සිටි කාන්තාවකගේ ඇඳුම පිළිස්සී එහි හැඩය පෙන්වන ආකාරයට ඇගේ සම පිළිස්සී තිබුන ආකාරය.මේ ගිනි බෝලය අහසටත් නගිනවා. පොලොව මතුපිටත් දවනවා. එයට හසුවන සියල්ල ක්ෂණයකින් දැවීයනවා. සෙල්සියස් අංශක 3000 කට වැඩි උෂ්ණත්වයක් පුංචිම පරමාණු බෝම්බයකින් ඇති කරනවා. ඊළඟට මොකද වෙන්නේ. ගිනිබෝලය පොලොව මත ඇති තද ඝන වස්තු ගල්, ගොඩනැගිලි, වැනි සෑම දෙයක්ම කුඩා කැබලි වලට පුපුරවා දමනවා. දූවිලි බවට පත්කරනවා. (ඒ නිසයි සුන්නද්දූලි කරනවා කියන වචනය මා මාතෘකාවට යෙදුවේ) ගිනි බෝලය අහසේ ඉහලට ගමන් කලාම හරියට බිම්මලක හැඩය ගන්නවා. ගිනි බෝලයේ ඉතා අධික උණුසුමෙන් අවට වායුගෝලය ක්ෂණයකින් රත්වී මහා බලසම්පන්න වායු පිපිරීමක් ඇතිවෙනවා.  එය කොතරම් ප්‍රබලද කියනවානම්, එයට හසුවන ගොඩනැගිලි බිමට සමතලා කරනවා. කෝච්චියක් වුනත් ඔසවා ඈතට විසිකරනවා. ඈත තිබෙන ගොඩනැගිලි ඉරිතලනවා. වීදුරු ජනෙල් සිල්ල කුඩුවී යනවා. කම්පනයෙන් භූමි කම්පාවක් ඇති කරන තරමට පොලොව හෙල්ලෙනවා. ඒ වායු පිපිරීම ඉතා ඈතට දැනෙන්නේ මහා සුළඟක් ලෙසයි. පරමාණු පිපිරීමෙන් ගැමාකිරණ නිකුත්වෙනවා. ඒවා විශාල දුරකට නොගියත් ඒ කිරණ වැදුන ගස් ගල්, ගොඩනැගිලි, යාන වාහන, වාතය, ජලය, විකිරණශීලී තත්වයට පත්වෙනවා. අහසට විහිදෙන ගිනි බෝලය, ඇසට පෙනෙන නොපෙනෙන සියලු ප්‍රමාණයන්ගෙන් විවිධ ද්‍රව්‍ය (පිපිරීමෙන් විනාශවූ පොලොව මත පිහිටා තිබුණු සියලුදේ වලින් කැඩී බිඳී ගිය කොටස්) අහසේ ඉහලට රැගෙන යනවා. ඒවාගේ ස්කන්ධය අනුව සුළඟ මගින් ඒවා විවිධ දුර ප්‍රමාණයන් වෙත විසුරුවනු ලබනවා. ඒ සියල්ලම විකිරණශීලී ද්‍රව්‍ය. එයින් නිකුත්වන විකිරණ ඈත පරිසර පද්ධතීන්හි සිටින සියලුම ජීවී අජීවී වස්තු වෙත ඉඳුරාම විකිරණ වල බලපෑම එල්ල කරනවා. එයින් ඇතිවන භයානක ප්‍රතිඵල වසර ගණනාවකට, පරම්පරා ගණනාවකට ඉවත්වන්නේ නැහැ. ඒ සඳහා ප්‍රතිකාරත් නැහැ. කවදා හෝ ඒ විකිරණශීලී ද්‍රව්‍ය වල විකිරණශීලී බව ඉබේම අවසන්වනතුරු ඒවා ඒ අහිතකර බලපෑම එල්ල කරමින් පවතිනවා.

මේ තියෙන්නේ එදා හිරෝෂිමාවට දමන ලද ප්‍රමාණයේ බෝම්බයක බලපෑමයි.මෙහි හයිපොසෙන්ටර් Hypocenter යනුවෙන් දැක්වෙන්නේ පිපුරුම් ලක්ෂ්‍යයේ ගැඹුරුම ස්ථානයයි. අද ලෝකයේ ඇති පරමාණු බෝම්බයකින් මෙහි දැක්වෙන දුරට වඩා විශාල දුරක් විනාශ වියහැකියි. (mi = සැතපුම්) පරමාණු බෝම්බයක් පුපුරන හැටි බලමුද.  මෙන්න එදා ජපානයේ හිරෝෂිමා නගරයට එල්ල වුන පරමාණු බෝම්බයේ පිපුරුම.

පරමාණු බෝම්බයක විකිරණ බලපෑම දීර්ඝකාලීනව පවතින බවට සාක්ෂි අදත් ජපානයේ තිබෙනවා. අදටත් එහි සෑහෙන පිරිසක් සිටිනවා විකිරණ වලට ලක්වීම නිසා සුව නොවන පිළිකා ඇතුළු විවිධ රෝගාබාධ මෙන්ම ජාන විකෘතිවීම් වලට ලක්වූ අය.

  ඉතින් මේ ටික කියෙව්වට පස්සේ පරමාණු බෝම්බ එපා වුනාද? පොඩ්ඩක් ඉන්න. කෝකටත් ඔන්න ඔහේ පරමාණු බෝම්බයක සැකැස්ම ගැනත් ටිකක් ඉගෙනගන්න. කවුද දන්නේ, මේ අඩවියෙන් බලලා, ඔබටත් එකක් හදන්න පුළුවන් වුනොත්, අපිත් බොහොම බලවත් රටක් වෙනවා. (හැබැයි ඉතින් ඇමරිකන් කාරයා රෙද්ද කරේ තියාගෙන එයි සම්බාධක දාන්න) ඇත්තටම පරමාණු බෝම්බයක් සෑදීම අපහසු වන්නේ ඒ සඳහා අවශ්‍ය යුරේනියම් මූලද්‍රව්‍යය ලෝකයට හොරෙන් එකතුකිරීම සහ ප්‍රතික්‍රියාකාරක ආරම්භ කිරීමට නොහැකි බැවින්. නවීන තාක්ෂණය නිසා සෑම රටකම සිදුවන රහස් තවත් රටවල් දැනගන්නවා. ඔත්තු බලන ක්‍රම ඉතා දියුණුයි. තානාපති සේවා වලට අමතරව විවිධ ක්‍රම (රාජ්‍ය නොවන සංවිධාන, බහුජාතික සමාගම්, විවිධ ව්‍යාපාරික ජාලයන්) මගින් ඔත්තු බැලීම සිදුකෙරෙනවා. මේ බලන්න චීනය පොළොව යට න්‍යෂ්ටික අවි ගබඩාවක් හදන බව ඇමරිකානු ඔත්තු බලන චන්ද්‍රිකාවකින් දැකපු හැටි.පරමාණු බෝම්බයක සැකැස්ම අතිශයින් සංකීර්ණයි. එදා ජපානයට හෙලන ලද පරමාණු බෝම්බයේ සැකැස්ම පෙන්වන රූප සටහනක් තිබෙනවා. නමුත් මේ රූපයේ ඒම බෝම්බයට අදාළ වැදගත් කොටස් කීපයක් පෙන්වා නැහැ. එයට හේතුව ඒ තොරතුරු අතිශයින් රහසිගත ඒවා වීමයි.  පරමාණු බෝම්බයට වඩා බලවත් ජලකර බෝම්බය ගැන මා ඔබ සමග සාකච්ඡා කිරීම බලාපොරොත්තු නොවන්නේ එය ඉතා සංකීර්ණ නිසයි. නමුත් නියුට්‍රන් බෝම්බය සහ ඊ බෝම්බය පිළිබඳව කෙටි සටහනක් තැබීම වැදගත් යයි සිතුන නිසා ඒ ගැන කියන්නම්. නියුට්‍රන බෝම්බය හඳුන්වන්නේ ‘උසස් තත්වාරෝපිත විකිරණ විදාරණ අවියක් – Enhanced Radiation Weapon = ERW’ ලෙසයි. තාප න්‍යෂ්ටික අවි අතර නියුට්‍රන් බෝම්බයට හිමිවන්නේ අද්විතීය ස්ථානයක්. මේ බෝම්බය, සාමාන්‍ය න්‍යෂ්ටික බෝම්බයක ඇති පිපුරුම් ශක්ති විදාරණයට වඩා වෙනස්ව ක්‍රියා කරමින්, මහා බලගතු නියුට්‍රෝන ශක්ති විදාරණයක් සිදු කරනවා. මේ නිසා ජීවීන්ගේ සෛල පටල ක්ෂණයකින් විනාශ වෙනවා. ගැමා කිරණ මගින් මහා විශාල හානියක් සිදු කරනවා. වෙනත් වචන වලින් කියනවානම් සාමාන්‍ය න්‍යෂ්ටික බෝම්බයක ඇති පිපුරුම් බලයට විනිවිද යා නොහැකි ඝනකම මතුපිටවල් (කොන්ක්‍රීට්, යුධ ටැංකිවල ඝන යකඩ ආවරණ තහඩු වැනි) විනිවිද ගොස් මහා විනාශයක් (සමූල ඝාතනයක්) සිදුකරනවා. මේ නිසා විශාල භූමි ප්‍රදේශයක සිටින යුධටන්කි සහ මිසයිල්වලින් සන්නද්ධ මහා යුද සේනාවක් විනාශ කිරීම නියුට්‍රන් බෝම්බ වඩාත් සුදුසු වෙනවා. බෝම්බ වල ශක්ති ප්‍රමාණය මනින ඒකකය වන කිලෝටොන් වලින් එකක් හෙවත් කිලෝටොන් එකක නියුට්‍රන් බෝම්බයකින් පිපුරුම් ලක්ෂ්‍යයේ සිට කිලෝ මීටර් දෙකකට ආසන්න අරයක පිහිටි ප්‍රදේශයකට බරපතල හානි සිදුකල හැකියි. (නමුත් සෑම බෝම්බයක්ම නිපදවන්නේ කිලෝටොන් එකකට වඩා වැඩි ශක්තියකින්) නියුට්‍රන් බෝම්බයක්, මිසයිලයක් මගින් හෝ, ගුවන් යානයකින් හෙලන බෝම්බයක් ලෙස හෝ, කාලතුවක්කු උණ්ඩයක් ලෙස හෝ, එල්ල කල හැකියි.

  දැන් අපි ටිකක් බලමු කවුද ලෝකේ ඉන්න ලොකුම බෝම්බ කාරයෝ කියලා. පහත දැක්වෙන සටහන කියවන්න වචන වලට වඩා ලොකු විස්තරයක් එතන තියනවා.දැන් පෙනෙනවා නේද තත්වය. ලෝක යුද්ධයක් ඇවිලුනොත් මුළු ලෝකයම ක්ෂණයකින් විනාශ කල හැකි තරම් න්‍යෂ්ටික අවි මහා විශාල ප්‍රමාණයක් තියනවා. මේ තොරතුරු වලට ඇතුලත් නොවී රහසිගතව තිබෙන අවි තව කොපමණ ඇද්ද කියා හිතාගන්නවත් බැහැ. ඊළඟට බලමු බොහෝදුරට නිවැරදි තොරතුරු අනුව මේ අවි කොහෙද රඳවලා තියෙන්නේ කියලා.ඔබ මෙම සිතියම හොඳින් නිරීක්ෂණය කලොත් පෙනෙයි මේ අවි වලින් බහුතරයක් රඳවා තිබෙන්නේ නිරක්ෂයට ඉහල ප්‍රදේශවල බව. එයට හේතුව වන්නේ පහර දීමට ඇති ඉලක්කවල පිහිටීම අනුව මෙසේ ස්ථානගත කිරීම වඩාත් වාසි සහගත වීමයි.අපි මේ කතාව ආරම්භ කල මේ ලිපියේ පළමුවැනි කොටසේදී කිව්වනේ උතුරු කොරියාවට හොඳටම තද වෙලා දකුණු කොරියාවටයි, අමරිකාවටයි, ජපානේටයි, ඔක්කොටම ගහන්න යන්නේ කියලා. උතුරු කොරියාවේ තත්වය කොහොමද? මම කියන්නේ න්‍යෂ්ටික ප්‍රහාරක ශක්තිය පිලිබඳ තත්වය. බලන්න පහල සටහන දෙස.

 උතුරු කොරියාවට අවශ්‍යනම් ඇමරිකාවේ ඇලස්කා ප්‍රාන්තයටත්, සැන් ෆ්‍රැන්සිස්කෝ, ලොස් ඇන්ජලස්, වැනි මහා නගර වලටත් ගහන්න පුළුවන් බව පෙනෙනවා. කොහොමද වැඩේ? ලිපිය කියවාගෙන ඉදිරියට එන්න එන්නම තත්වයේ දරුණුකම නේද වඩ වඩාත් දැනෙන්නේ? මේ තමයි ලෝකයේ හැටි. මේ තමයි මනසින් උසස් කියන මිනිසාගේ හැටි. 

  ලිපියේ අද කොටස අවසන් කරන්නේ තවත් එක බෝම්බයක් ගැන කියලයි. ඒ තමා ඊ බෝම්බය හෙවත් විද්‍යුත්චුම්බක තරංග බෝම්බය. Electromagnetic Bomb එක අතකට මේ බෝම්බය බොහොම අහිංසකයි. (අහිංසක? බෝම්බ කොහෙද අහිංසක? ) මේ බෝම්බයෙන් ජීවීන්ට ඉඳුරාම හානියක් සිදුවන්නේ නැහැ. මේ බෝම්බයෙන් කරන්නේ සාමාන්‍ය මට්ටමේ සංඛ්‍යාතවල සිට ඉතා අධික සංඛ්‍යාතයකින් යුත් විද්‍යුත් චුම්බක තරංග කිසියම් ඉලක්ක ගත ප්‍රදේශයක් පුරා පතුරවා හැරීමයි.  මෙම තරංග අඩු ශක්ති මට්ටමෙන්, මධ්‍යම ප්‍රමාණයේ ශක්ති මට්ටමෙන්, සහ අධි ශක්ති මට්ටමෙන් මුදා හරින්න පුළුවන්, බෝම්බය සකසන ආකාරය අනුව. අඩු ශක්ති බෝම්බයකින් සිදුවන්නේ, ඉලක්කගත ප්‍රදේශයේ පිහිටි, සියලු විදුලි සහ විද්‍යුත් පරිපථ, සැලකිය යුතු වෙලාවක් අක්‍රියවී යාමයි. ඒ කාලය ඇතුළත, ප්‍රහාරය එල්ල කල අයට පුළුවන්, කල්තියා තමන්ගේ එවැනි පරිපථ ආරක්ෂාකාරීව තබාගෙන, සතුරු පරිපථ අක්‍රීයවූ අවස්ථාවේදී තමන්ගේ උපකරණ වලින් අවශ්‍ය වැඩ කරගන්න. මධ්‍යම මට්ටමේ ප්‍රහාරයකදී පරිගණක දත්ත අවුල්වී යන අතර පරිගණක මගින් පාලනය වන සියලුම යාන්ත්‍රික පද්ධති අක්‍රිය වෙනවා. ඉහළ මට්ටමේ ප්‍රහාරයකින් සියලු විදුලි සහ විද්‍යුත් පරිපථ සම්පූර්ණයෙන් විනාශවී යනවා. ඉතිං මේ මගින් මිසයිල් යැවීමත් අඩපන කරන්න පුළුවන්. නමුත් මතක තියාගන්න රාස්සයා කන පරාස්සයා කියලා කියමනක් අපේ රටේ තියනවානේ. ඒ නිසා මේ බෝම්බ කල්තබා හඳුනාගැනීමේ ක්‍රම දැන් වැඩි දියුණු වෙමින් පවතිනවා. අනාගතේදී ලෝකය ගහගන්නේ සොල්දාදුවන් යුද භූමියට යවන්නේ නැතුව පරිගණක තාක්ෂණයෙන්. ඒ ගැන ලිපි ගොඩක් ඉදිරියේදී පලකරන්න හිතාගෙන ඉන්නවා මම.

  ‘ඊ බෝම්බය’ කියා දෙයක්, තොරතුරු තාක්ෂනයේදීත් තියනවා. ඒ කියන්නේ ඊ මේල් එකක් මගින් විනාශකාරී වෛරසයක් එවීමයි. 

  පරමාණු බෝම්බ ගැන කතා කරද්දී 1945 වසරේදී ජපානයට එල්ලවූ පරමාණු බෝම්බ ප්‍රහාර දෙක කවදාවත් අමතක වන්නේ නැහැ. ලෝක ඉතිහාසයේ මෙතෙක් එල්ලවූ එකම පරමාණු බෝම්බ ප්‍රහාරය එයයි. මේ පිළිබඳව වෙනමම ලිපියකින් කියන්න තරම් කරුණු තියනවා. පසුව වෙනමම ලිපියක් ලියන්නම්. මේ ප්‍රහාර දෙකෙන් හිරෝෂිමා නගරය හා ඒ ආශ්‍රිත ප්‍රදේශයේ 166,000 ක් පමණ මියගියා. නාගසාකි නගරයේ මියගිය සංඛ්‍යාව 800,00 ක්. ඒ ආසන්නතම ගණන් බැලීමක් පමණයි. දැන් තිබෙන පරමාණු බෝම්බයක් එදා පරමාණු බෝම්බයකට වඩා 40 ගුණයකින් පමණ ශක්තියෙන් වැඩියි. එතනින් එහා දේ ඔබම හිතන්න. කවුද මේ බෝම්බ වල නිර්මාතෘ? ඔහු තමයි ඇමරිකානු ජාතික රොබට් ඔපන්හයිමර්. පළමුවැනි වරට අත්හදා බැලීමේ පරමාණු පිපිරවීම දෙස බලාසිටි ඔහුගෙ මුවගට නිතැතින්ම නැගී තිබෙන්නේ, භගවද් ගීතාවේ එන වැකියක්. ‘මම ලෝකයට මරණය මෙන් වීමි’ යන්න එහි අරුතයි.

  මා හිතනවා මීට වඩා අද ලිපිය දීර්ඝ නොකළ යුතුයි කියා. ඔබට නැගෙන ප්‍රශ්න අනුව සහ ඔබේ වටිනා අදහස් අනුව මීළඟ කොටස සකසන්නම්. තවත් සමූල ඝාතක අවි වර්ග දෙකක් (රසායනික සහ ජීව විද්‍යාත්මක) ගැන ඉදිරි ලිපි වලදී සාකච්ඡා කරමු.

  මේ ලිපියට අදාළ සියලුම රූප සටහන් ලබාගත්තේ Google Images වෙතින්. 

2013 අප්‍රේල් මස 24 වැනි දින 1256 පැය