පසුගිය මාසයේ මැද භාගයේදී මා ඔබවෙත ඉදිරිපත් කළ ‘කේළමා, අවලමා, ඔත්තුකාරයා,‘නමැති ලිපිය ඔබට මතක ඇතැයි සිතනවා. මේ කෙටි ලිපිය ඒ ලිපියට ඌණ පූරණයක් ලෙසයි ඉදිරිපත් කරන්නේ. එම ලිපියේදෙවැනි කොටසේ අවසානයේදී මා සඳහන් කළා ඔබට මතක ඇති, නියමුවන් රහිත ප්‍රහාරක ගුවන් යානා සෑදීමේ තරගය ඉතා වේගවත්ව බලවත් රටවල් අතර සිදුවන බව. එහි අලුතෙන්ම ඇතිවූ, විශ්මයජනක සහ ප්‍රබල විප්ලවීය නිමැවුමක්, දින කීපයකට පෙර වාර්තා වුනා. ඒ තමයි, මෙතෙක් කල් නියමුවකු විසින් පදවන ලද, F 16 වර්ගයේ ප්‍රබළ ප්‍රහාරක යානයක්, සම්පූර්ණයෙන්ම දුරස්ථ පාලක ක්‍රමයකින් පදවන්නට හැකි ආකාරයට, ඇමරිකානු ගුවන් හමුදාව විසින් සකස්කර ඇති බව. මේ පින්තූරයේ තිබෙන්නේ එම යානයයි. තවත් පින්තූර දෙකක් පහත දක්වනවා. (පින්තූරය ගත්තේ මෙතනින්)
(පින්තූර ගත්තේ මෙතනින්)
පින්තූර බල බල ඉන්නේ මොකටද නේද? වීඩියෝ එකකින්ම බලමු මේ යානයේ කතාව. මේ තිබෙන්නේ මේ යානය ගැන බෝයින්ග් සමාගම සහ ඇමරිකානු ගුවන් හමුදාව නිකුත්කළ වීඩියෝවක්.
මෙහි ඇති විශේෂත්වය කුමක්ද?
නියමුවන් රහිත යානා – Unmanned Arial Vehicle = UAV (Drone) යන වර්ගීකරණය යටතේ දැනට නිපදවා ඇති හොඳම යානයේ වේගයට වඩා හතර ගුණයකින්, මේ F 16 යානය වේගයෙන් වැඩියි. එමෙන්ම, මේ යානයේ අවි පද්ධතියද, දැනට තිබෙන හොඳම ඩ්‍රොන් යානයේ අවි පද්ධතියට වඩා දියුණුයි. අවශ්‍යනම් න්‍යෂ්ටික බෝම්බයක් වුනත් හෙළන්නටත් පුළුවන්. ඩ්‍රොන් යානයකට ‘පාලක නියමුවන්’ වෙනමම පුහුණු කළයුතුයි. නමුත් F 16 සඳහා පළපුරුදු නියමුවකුට, පාලක මධ්‍යස්ථානයේ සිටම, තම ජීවිතයද බේරාගනිමින්, තම පළපුරුද්ද උපයෝගී කරගනිමින්, ඕනෑ තරම් ‘කරනම් ගහන්නට’ දැන් පුළුවන් වෙනවා. ඩ්‍රොන් යානයක් මෙතරම් වේගයෙන් සහ මෙතරම් කාර්යක්ෂමව හැසිරවීම අපහසුයි. පළපුරුදු නියමුවකුට, මේ යානයේ නියමු කුටිය විදිහටම, (simulated control booth) පාලක කුටිය සකසා දීමෙන්, ඔහුට හැකිවෙනවා, ගුවනේ සිට පෙන්වන ‘සෙල්ලම්’ (tactics) ඔක්කොම ඒ කුටියේ සිට කරන්නට.
මේ යානය නිපදවා තිබෙන්නේ ගුවන්යානා නිෂ්පාදනයේ දැවැන්ත, එමෙන්ම ලෝකප්‍රසිද්ධ බෝයින්ග් – Boeing සමාගම සහ ඇමරිකානු ගුවන් හමුදාව එක්වීමෙනුයි. නමුත් F 16 ප්‍රහාරක ගුවන්යානයේ නිර්මාතෘ වරුන් වන්නේ සුප්‍රසිද්ධජෙනරල් ඩයිනමික්ස් - General Dynamics සමාගම සහ ඉන් පසුව, එම සමාගමෙන්, මෙම ගුවන්යානා නිපදවීමේ අයිතිය මිලදීගත්, ලොක්හීඩ් මාර්ටින් – Lockheed Martin සමාගමයි. දීර්ඝ කාලයක් තුළ කරන ලද පර්යේෂණයක සාර්ථක ප්‍රතිඵලයක් තමයි මේ දුරස්ථ පාලක යානය. F 16 යානය වියදම් අධික යානයක් ලෙස සළකා අත්හැර දැමීමේ සූදානමක් තිබුණා. ඇත්තටම අත්හැර දමමින් තිබුණා. නමුත් මේ විප්ලවීය වෙනස නිසා යළිත් ඒ ගුවන්යානය යුද කටයුතු සඳහා එක්වෙනවා. මේ යානය ගැන විස්තරයක් පහත දක්වමින් මේ ලිපිය අවසන් කරණනවා.
- වර්ගීකරණය : බහුකාර්ය ප්‍රහාරක ගුවන් යානය Multirole fighter aircraft
- නිර්මාතෘ/නිෂ්පාදක : ඇමරිකා එක්සත් ජනපදය
- ප්‍රථම වරට ගුවන්ගත කරන ලද්දේ : 1974 ජනවාරි 20 දින
- යුද කටයුතු සඳහා හඳුන්වාදීම : 1978 අගෝස්තු 17
- මෙතෙක් නිපදවා ඇති යානා ගණන : 4500 කට වැඩියි.
- මේ යානය පාවිච්චි කරන වෙනත් රටවල්
- එන්ජිම : F-16C/D: one Pratt and Whitney F100-PW-200/220/229 or General Electric F110-GE-100/129
- ත්වරණය : රාත්තල් 27000 යි – කිලෝග්‍රෑම් 12247 යි
- යානයේ දිග : මීටර් 14.8 යි
- යානයේ උස : මීටර් 4.8 යි
- පියාපත් දෙකෙළවර අතර පළල : මීටර් 9.8 යි
- උපරිම වේගය : පැ.කි.මී. 2414 යි (මැච් - Mach 2 යි)
- යා හැකි උපරිම උස : අඩි 50000 යි (කි.මී.15 යි)
- ගෙනයාහැකි උපරිම බර (අවි ආයුධ/බෝම්බ) : කි. ග්‍රෑම්. 16785 යි
- සම්පූර්ණයෙන් තෙල් පිරවූ පසු යා හැකි උපරිම දුර : නාවික සැතපුම් 1740 යි
- යානයේ සවිකර ඇති/ගෙනයන අවි ආයුධ සහ උපකරණ : M-61A1 මි.මී 20 මල්ටි බැරල් තුවක්කු 1 යි , ගුවනේ සිට ගුවන් ඉලක්ක වෙත විදින මිසයිල් 6 යි,ගුවනේ සිට පොළොවට විදින මිසයිල් 6 යි, සතුරු ගුවන්විදුලි සංඥා අවුල් කර දමන විද්‍යුත් උපකරණ.
- පැදවීම/පාලනය : F 16 C මොස්තරයේදී නියමුවන් 1 යි. F 16 D මොස්තරයේදී නියමුවන් 1 යි හෝ 2 යි. (දැන් නියමුවන් රහිතව)
- යානයක වටිනාකම 2000 වර්ෂයේදී : F-16A/B ඇමරිකානු ඩොලර් මිලියන 30.1 යි. F-16C/D ඇමරිකානු ඩොලර් මිලියන 34.3 යි.
මෙම යානය ගැන තවත් විස්තර ලබාගැනීමට හැකි සබැඳියාවන් තුනක් පහත දක්වනවා. මේ සඳහා මග පෙන්වූ සමීර නාදුගල ට මගේ විශේෂ ස්තුතිය පුදකරනවා.
2013 සැප්තැම්බර් මස 26 දින 2346 පැය
මූලාශ්‍ර;
- http://www.dailymail.co.uk/news/article-2431571/F-16-takes-flight-WITHOUT-pilot-Boeing-converts-ageing-fighters-drones-U-S-Air-Force-target-practice.html
- http://www.policymic.com/articles/65269/this-fighter-jet-flies-without-a-pilot
- http://nypost.com/2013/09/25/air-force-creates-drone-f-16/
- http://www.ubergizmo.com/2013/09/f-16-jet-piloted-remotely/
- http://www.acig.org/artman/publish/article_276.shtml
- http://inventors.about.com/library/inventors/bl_Fighting_Falcon.htm
- http://en.wikipedia.org/wiki/General_Dynamics_F-16_Fighting_Falcon
No comments :
Post a Comment